Тускъаты Таймураз бабæрæг кодта социалон объектты арæзтад

Тускъаты Таймураз радон хатт бабæрæг кодта социалон объектты арæзтад. Се 'хсæн скъолатæ, спортивон комплекстæ æмæ медицинон куыстуæттæ. Алагиры районмæ абалц кодта не сфæлдыстадон къорд дæр. Кусгæ балцы рæстæг фыццаг пункт - Рамоновæ. Тагъд рæстæг ам фæзындзæн фелсырон-акушерон пункт. Объекты паспорты æвдыст цæуы, фидæны йæ хуыз цавæр уыдзæн, уый. Арæзтадон куыстытæ райдыдтой майы. Бацæттæ ын кодтой йæ бындур. Тускъаты Таймураз йе 'ргом раздæхта блоктæ раст æвæрд кæй не 'рцыдысты, уымæ. Сентябрмæ медицинон уагдон хъуамæ сцæттæ уа. Кусæнгæрзты ифтонгадæн рахай кодтой 1 милуан сомæй фылдæр. Поселоччы цæры 850 адæймаджы. Цалынмæ ног бæстыхай цæттæ кæны, уæдмæ уал пациентты исынц раздæры бæстыхайы. Црауы амбулаториийы дæр бындуронæй цалцæг кæнынц. Арæзтадон куыстытæ сæ тæмæны бацыдысты. Ныридæгæн сног кодтой бæстыхайы æддаг бакаст, рахызтысты мидæггаг куыстытæм. Æвæрд æрцыдысты ног рудзгуытæ. Электрон тыхы æмæ дондзæуæн системæтæ дæр ногæй раивтой. Црауы скъолайы ма цалцæг кæнынц спортивон зал. Ног ахуыры аз ам фæзындзæн спортивон секцитæ. Арæзтадон куыстытæ ма цæуынц Бирæгъызæнджы дæр. Ам цæттæ сты уæлæдарс ивæн агъуыстытæ. Спортивон зал ма сифтонг кæнын хъæуы æмбæлгæ кусæнгæрзтæй. Алагиры сывæллæтты аивады скъолайы дæр бындурон цалцæг райдыдта мартъийы кæрон. Бæстыхайы сæр ногæй баивтой. Ныртæккæ дзы цæуынц мидæггаг куыстытæ. Сног дзы кодтой хъармгæнæн системæ. Фæлæ аразджытæ куыд зæгъынц, афтæмæй æппæт куыстытæ дæр фæуыдзысты афоныл. Арæзтад æмæ архитектурæйы министрады ныфс бавæрдтой, куыстытæ афоныл кæй фæуыдзысты, уымæй. Скъола йæ дуæрттæ байгом кæндзæн сентябры. Кусгæ балцы фæстаг пукнт культурæйы хæдзар Суададжы. 1995 азæй нырмæ иу хатт дæр нæ уыд цалцæггонд. Ныртæккæ зилынц йе 'ддаг бакастмæ, мидæгæй та ногæй ивынц пъолтæ. 1-æм июлмæ объект хъуамæ кæронмæ сцæттæ уа. Республикæйы хицауады сæрдары хæстæ рæстæгмæ æххæстгæнæг Тускъаты Таймуразы ныхæстæм гæсгæ, социалон нысаниуæг цы объекттæн ис, уыдонмæ дарддæр дæр йе 'ргом 'здахдзæн. Пелиты Сабинæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv