ПРОВЕЛИ ПРАЗДНИК ОС

Ирыстоны цæрджытæ абон бæрæг кæнынц Лæгты Дзуармæ Кувæн къуырийы æрвитæн бон. Æнæхъæн къуыри республикæйы кæмтты, хъæуты, алы хæдзары дæр адæм куывтой æртыгай чъиритæй Хуыцаумæ, йæ минæвæрттæм, зæдтæ æмæ дауджытæм. Æрвитæн изæры дæр хæдзары скæнынц æртæ чъирийы, æмæ бинонты хистæр йæ кæстæрты бафæдзæхсы Лæгты Дзуарыл, азæй-азмæ бинонтæ бæрæгбоныл æнæниз-æнæмастæй куыд æмбæлой, кæстæртæ амондджын куыд уой, иннæ аз Уастырджийæн ноджы стырдæр кусарт куыд акæной. Ацы аз Лæгты Дзуармæ кувæн къуыри Ирыстоны цæрджытæ арвыстой хиуылхæцгæйæ. Ныртæккæйы уæззау эпидемиологон уавæр хынцгæйæ, адæмæй куырдтой, цæмæй егъау куывдтæ æмæ кадджын мадзæлттæ ма аразой, сæхи æмæ сæ бинонты рынæй бахизой. Фæлæ уæддæр, куыд раздæрау, афтæ ныр дæр сæйрагдæр уыди Лæгты Дзуармæ сыгъдæг зæрдæ æмæ хъуыдытимæ скувын. Уæдæ йе ’рвитæн изæр дæр, йæ къух кæмæн куыд амоны, алы хæдзары дæр æртæ уæлибæхæй бæрæгбонæн иу хатт ма кувынц, цæмæй фæрныг цæрд кæнæм æмæ нæ фидæны ацафон бæркадджындæр уа. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv