Дзæуджыхъæуы æрымысыдысты Цæгат Ирыстоны адæмон нывгæнæг Тугъанты Махарбеджы рухс ном

140 азы размæ Дур-Дуры хъæуы райгуырд Цæгат Ирыстоны адæмон нывгæнæг Тугъанты Сафары фырт Махарбег. Нæ культурæ æмæ историйы ныууагъта арф æмæ зынгæ фæд. Йæ ном хæссынц Дзæуджыхъæуы аивæдты музей, йæ райгуырæн хъæу Дур-Дуры та ис йæ номыл хæдзар-музей. Ацы бонты ын Цæгат Ирыстоны йæ удуæлдай куыстæн аргъгæнджытæ мысыдысты йæ рухс ном. Сæумæрайсом ирон аргъуаны кæрты къахбавæрæн дæр нæй. Ардæм адæм æрæмбырд сты Тугъанты Махарбеджы рухс ном æрымысынмæ, йæ ингæныл дидинджытæ æрæвæргæйæ иу чысыл æдзæмæй алæууынмæ. Иры зындгонд нывгæнæг Тугъанты Махарбег райгуырд 140 азы размæ. Аивады, уæлдайдæр та нывкæнынад æмæ скульптурæйы, йæ фыццаг къахдзæфтæ Тугъаны фырты куыстытимæ зонгæйæ чи кодта, йæ курдиатæн ын уæлдай аргъ чи кæны, уыдон иуылдæр сты ам. Тугъанты Махарбег Петербургы Имераторы номыл аивæдты академимæ ахуыр кæнынмæ бацыд 1901 азы. Ацы артдзæстæй бирæ зындгонд нывгæнджытæ бакъахдзæф кодтой аивады дунемæ. Æрыгон ссæдзаздзыд лæппумæ дæр амонд мидбылты бахудт. Йæ ахуыргæнæг уыд зындгонд нывгæнæг Илья Репин. Рауад дзы хорз нывгæнæг, йæ фыды уæзæгмæ фæстæмæ куы æрыздæхт, уæд зæрдиагæй бацархайдта Дзæуджыхъæуы аивæдты студи байгом кæныныл, Цхинвалы та — нывты галерейыл. Специалистты ныхæстæм гæсгæ, Тугъаны-фырт ирон культурæ æмæ историмæ бахаста стыр æвæрæн. Йæ ном хæссынц Дзæуджыхъæуы аивæдты музей, Цхинвалы училищæтæй иу,æмæ цалдæр уынджы Цæгат Ирыстоны. Тугъанты Махарбег у Цæгат Ирыстоны фæсивæдæн фæзминаг. Йæ ном айхъуыст æппæт дунейыл дæр, фæлæ йæ зæрдæ не`сивта йæ райгуырæн зæххыл. Цы фæллæйттæ ныууагъта, уыдон бирæ æрыгон ирон нывгæнджыты сразæнгард кодтой дарддæр дæр ацы къабазы архайынмæ, аивады бæрзæндтæм хизынмæ. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv