Æппæтуæрæсеон адæмон фронты уæнгтæ сбæрæг кодтой Алагиры районы скъолаты хæрæндæтты уавæр

Æппæтуæрæсеон адæмон фронты уæнгтæ сæ цæст дарынц, республикæйы скъолаты тæвд хæринаг сабитæн куыд цæттæ кæнынц, уымæ. Абон федтой Майрæмададжы, Дзуарыхъæуы æмæ Хæтæлдоны скъолатæ. Эксперттæ æркастысты, санитарон æмæ Уæрæсейы фæлхасгæнджытæм цæстдарды службæйы домæнтæ куыд æххæст кæнынц скъолаты хæрæндæтты, уымæ. Тæвд сихортæ цæттæ кæнынц райдиан кълæсты сабитæн. Хæрынц лæвар. Меню арæзт у 10 бонмæ. Менюйы хыгъды абон ис дзул, нæлхæ, картофыссæст, кæсаг æмæ цай лимонимæ. Иу порцийы картофыссæсты уæз хъуамæ уа 150 граммы, кæсаг та 80 граммы. Эксперттæ лæмбынæг æркастысты алы лыстæгдзинадмæ дæр. Хъæндзинæдтæ нæ рабæрæг кодтой. Майрæмададжы скъолайы сихор æмбæлы 45 скъоладзауæн. Уыимæ ма æххуысцух бинонты сывæллæттæн дæр. Хæрæндоны куыстмæ фарстатæ нæ разынд. Хъæугæ кусæнгæрзтæй дæр ифтонггонд у. Хъæуы ма сæ æрмæст иу уазалгæнæн. Кусгæ та дзы кæны æрмæст иу адæймаг. Уый эксперттæ фæнысан кодтой аиуварсгæнинаг фарстаты хыгъды. Дарддæр Æппæтуæрæсеон адæмон фронты уæнгтæ бабæрæг кодтой Дзуарыхъæуы скъола. Ахуыргæнæндоны сихор æмбæлы 44 скъоладзауæн. Ам дæр эксперттæ æркастысты куысты бынаты сыгъдæггдзинадмæ æмæ фæткмæ. Фиппаинæгтæ сæм нæ разынд. Алцыдæр хæрæндоны у фæткмæ гæсгæ. Æнæ иу къуылымпыдзинадæй. Рейды архайджытæ федтой Хæтæлдоны скъола дæр. Æрвылбон ацы скъолайы сихор кæнынц 49 скъоладзауы. Хæрæндон гыццыл кæй у, уый тыххæй сихоры хæрд цæуы 2 фæлтæрæй. Фыццаг уал 1-æм къласы ахуырдзаутæ, уый фæстæ та иннæ кълæстæ. Сывæллæтæ хæринæгты адæй сты разы. Ныртæккæ скъолаты тæвд хæринаг куыд дæттынц, уый бæрæг кæнынмæ нысан кæнынц сæрмагонд къамистæ. Æппынæдзух зилынц нæ республикæйы æппæт горæтты æмæ хъæуты скъолатыл. Фæлæ Æппæтуæрæсеон адæмон фронты регионалон æххæстгæнæн комитеты разамонæг Гæлиты Клим куыд куд загъта, афтæмæй ацы хъуыддаджы уæлдай цæстдард нæ бахъыгдардзæн. Адæм æй куы зоной, цыфæнды афон дæр эксперттæ бæрæггæнæг æрбацæудзысты, уæд сæ куысты хæрзхъæддзинадмæ уæлдай лæмбынæг уыдзысты. Гæлиты Клим ма куыд фæнысан кодта, афтæмæй ног ахуыры азмæ менюмæ бахæссдзысты ивддзинæдтæ. Баххæст æй кæндзысты ног хæринæггтæй, скъоладзауты æмæ сæ ныййарджыты фæндмæ гæсгæ. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv