Абайты Заирæ постхæссæгæй кусы 24 азы

Пандемийы рæстæг куыстуæттæй иутæ сæ куыст баурæдтой, иннæты кусджытæ та куыстой дæрддзæфмæ. Фæлæ уыцы рæстæг æнæулæфгæйæ чи фыдæбон кодта, ахæмтæ дæр ис: дохтыртæ, барадхъахъхъæнджытæ, æнæнхъæлæджы цауты министрады кусджытæ. Уыцы хыгъды сты постхæссджытæ дæр. Сæ куысты фæтк нæ фæрогдæр, зындæр цы фæци, æндæр. Æрвылбон тагъд кæнынц, се 'рбацыдмæ сын чи æнхъæлмæ кæсы, уыцы адæммæ. Афтæ Абайты Заирæ дæр. Постхæссæгæй кусы ныр 24 азы. Абайты Заирæ фыццаг хатт газеттæ, фыстæджытæ æмæ æндæр ахсджиаг гæххæттытæ байуæрста 1997-æм азы, февралы. Уæдæй нырмæ, къæвда уа кæнæ хур - алкæддæр ис йæ куысты. Ныр 24 азы адæмæн хæссы хабæрттæ, бæтты сæ дунейы алы кæрæттимæ. Заирæ посты хайад хоны йæ дыккаг хæдзар. Куыстмæ æрбацæуы 7 сахатæй раздæр, цæмæй газеттæ æрбаласыны афонмæ йæ бынаты уа. Бацæттæ сæ кæны, куыд æмбæлы, афтæ æмæ æрзилы, цæрæн хæдзæрттæй йæм чи хауы, уыдоныл. Æрвылбон йæ бæрны вæййы 14 бирæуæладзыгон бæстыхайы. Постхæссæг куыд зæгъы, афтæмæй адæм фылдæр фыссынц газеттæ «Рæстдзинад» æмæ «Северная Осетия». Уæвгæ ныры дуджы канд газеттæ нæ хъæуы адæймаджы. Алкæй фæнд дæр сæ Заирæ хорз зоны. 2010-æм азы Заирæ сси æппæтуæрæсеон ерысты уæлахиздзау. Æвзæрстой хуыздæр постхæссæджы. Архайджытæ уыдысты Уæрæсейы æппæт къуымтæй - Мæскуы, Псков, Томск, Свердловск æмæ æндæр рæттæй. Ирыстоны минæвары фæлтæрддзинад сси раппæлыны аккаг. Посты историйæн йе `взартæ ссыдысты рагзаманты. Фыццаг хайад байгом Шотландийы 1712-æм азы. Уæдæй нырмæ æгас дунейыл апарахат службæ. Зæгъæм, Ирыстоны ныртæккæ ис 170 хайады бæрц. Сты алы районты æмæ дард хъæуты дæр, уымæн æмæ адæм постхæссæгæй тынгдæр, æвæццæгæн, никæмæ `нхъæлмæ кæсынц. Цалфæнды боны, цасфæнды рæстæг куы рацæуа, уæддæр. Коронавирусы пандемийæ куы рапарахат, уæддæр постæн йæ куыст æруромыны фадат нæ фæци. Æмбæрстой сæ ахадындзинад æмæ раздæрау лæггад кодтой адæмæн. Зын рæстæджыты кæддæриддæр уыдысты раззаг рæнхъыты. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv