РЦИ-А сæргълæууӕджы хæстæ рæстæгмæ æххæстгæнæгæн уыд æмбырд министрады æмæ кусæндæтты разамындимæ

Фыдыбæстæйы Стыр хæсты лæгдзинад æвдисгæйæ чи бацарфæтыд уыдоны намыс рох кæнæн нæй. 9 маймæ æфсымæрон ингæнтæ æмæ республикæйы мемориалон комплекстæм базилдзысты. Уый тыххæй абон дзырдтой хицауады хæдзары. Цæгат Ирыстоны сæргълæууæджы хæстæ рæстæгмæ æххæстгæнæг, сæйрагдæр фарстатæй иуыл нымайы, льготæтæ кæмæ хауы æмæ уæззау рынчын чи у, уыдоны хъæугæ хостæй сифтонг кæнын. Æмбырды тыххæй бæлвырддæр, нæ дарддæры æрмæджы. 9 майы бæрæгбоны `рцыдмæ Фыдыбæстæйы Стыр хæсты хъæбатырты мемориалтæ æмæ ингæнтæм базилын, стæй сæ куыстуæттæ æмæ кусæндæтты бæрны бакæнын. Ахæм хæс республикæйы сæргълæууæджы хæстæ рæстæгмæ æххæстгæнæг Сергей Меняйло сæвæрдта бæрнон адæмы размæ. Бæрæгбонмæ цæттæгæнæн мадзæлттæ цæудзысты канд Дзæуджыхъæуы нæ, фæлæ ма районты дæр. Номарæн фæйнæджытæ, хъусынгæнинæгтæ æмæ æндæр ахæм цæстуынгæ æрмæг хъуамæ баст уа Фыдыбæстæйы Стыр хæстимæ. Сергей Меняйло культурæйы министры хæстæ рæстæгмæ æххæстгæнæг Къубалты Эльбрусæн бабар кодта æрыгон фæлтæр æмæ республикæйы уазджытæн патриотон акци саразын. Сæрмагондæй, бакусын хъæуы хæстон архивтæ æмæ къамтимæ, цæмæй не `мзæххонты хъайтардзинад рох ма уа. Уæлахизы бæрæгбонмæ Цæгат Ирыстоны горæттæ æмæ хъæутæ аив кæндзысты цъæх фæлыстæй дæр. Дæнцæджы номыл Сергей Меняйло æрхаста Краснодары край. Æмбырды сæйрагдæр фарстатæй ма иу - льготæтæ кæмæ хауы æмæ уæззау рынчын чи у, уыдоны хъæугæ хостæй сифтонг кæнын. Хостæ хæццæ кæндзысты дæрддзæф хъæутæм дæр. Уымæй уæлдай Сергей Меняйло æнæниздзинад хъахъхъæныны министрад æмæ Уæрæсейы æнæниздзинадмæ цæстдарды регионалон управленийæн бахæс кодта хостæй ифтонгмæ æмæ се `ргътæм лæмбынæгдæр кæсын. Сергей Меняйло вазыгджын куыстыл нымайы министрадтæ æмæ муниципалитетты разамынды æмархайд цæрджытимæ. Бадомдта бæрнон адæмæй, цæмæй цæрджытæн «ма амæла»-йы къæбæр аппарæгау дзуæппытæ мауал дæттой. Ахуырады къабазмæ – уæлдай æргом. Ног ахуырадон азмæ хи цæттæ кæнын хъæуы рагацау. Къуыхцытæ ис æмæ сæ республикæйы сæргълæууæг фæнысан кодта. Зæгъæм, ахуырады 465 объектæй 43-йы нæй автоматикон зынгхуыссынгæнæн сигнализаци. Иуæй-иу бæстыхæйтты нæ фаг кæнынц æдасдзинады техникон фæрæзтæ. Нæй дзы фистæгцæуæн ахизæнтæ æмæ хъæугæ фæндаггон нысантæ. Æппæт хъæндзинæдтæ аиуварс кæнынæн хъæуы рæстæг, фæнысан кодта Сергей Меняйло. Æхцайы фæрæзтæ куыстытæн цас бахъæудзæн, уымæн дзуапп дæтдзæн хицауады сæрдар. Республикæйы разамонæг ма дырдта цалдæр хæсыл. Зæгъæм, бæлццæттæласæн къабазы тыххæй ног разамындæн хæстæгдæр рæстæг радзурдзысты дзуаппдæттæг министрады минæвæрттæ. Хыгъдон кусæндæттæ та прокуратурæимæ иумæ хъуамæ бацархайой инвентаризаци саразыныл. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv