Заводы поселоччы музыкалон скъолайы фæндырдзæгъджыты æмæ кафджыты къордтæ рамбылдтой «Гран-при»

«Величие кавказских гор», зæгъгæ, музыкалон æркаст ацыд Цæцæны республикæйы. Сæ курдиат дзы равдыстой Заводы поселоччы музыкалон скъолайы фæндырдзæгъджыты æмæ кафджыты къордтæ. Бацахстой дзы фыццаг бынæттæ. Стыр музыкалон инструментты уæз ацы чысыл къухтæн хæссы æрмæст æхсондзинад. Кæд чызджытæ фæндырæй цæгъдыныл нырма цыбыр рæстæг ахуыр кæнынц, уæддæр, музыкæмæ уарзондзинады фæрцы, сæ бон раппæлын у бирæ æнтыстдзинæдтæй. Уыцы уарзондзинад рæзын кæныныл та куыснц дæсны ахуыргæнджытæ. Чысыл фæндырдзæгъджытæ куы базыдтой ног æркасты архайдзысты, уæд сын тынг æхсызгон уыд. Дыууæ мæйы дæргъы сæхи бæстонæй цæттæ кодтой. Цæгатирыстойнаг фæндырдзæгъдджытæ сæ курдиатæй адæмы зæрдæтæ балхæдтой Цæцæны. Сæ арæхтдзинадæн сын жюрийы уæнгтæ скодтой стыр аргъ. Къорд сси «Гран-при»-йы хицау. Конкурсмæ сæхи цæттæ кодтой кафджыты къорд дæр. Дыууæ къуыримæ сæвæрдтой «Хохаг» æмæ «Чызджыты» кæфтытæ. Кафджыты къорд конкурсы бацахста дыккаг бынат. «Величие кавказских гор» æркаст цыди дыууæ боны, архайдтой дзы Цæгат Кавказы алы республикæтæй сфæлдыстадон къордтæ. Сценæйæ æвдыст æрцыдысты кæфтытæ, алыхуызон инструменттыл цæгъдтытæ æмæ зарджытæ. Уæлахиздзаутæ æрцыдысты хорзæхджынгонд кады гæххæттытæ æмæ майдантæй. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv