Ирон чъиритæ фыцыны компетенци ныр 4 æм аз ис профессионалон дæсныйæдты чемпионат «Абилимпикс» ы хыг

Ирон чъиритæ фыцыны компетеци Ныр 4-æм аз ис чемпионат «Абилимпикс»-ы дæсныйæдты хыгъды. Нæ республикæйы йæ ерыстæм бахастой 2017-æм азы. Дыууæ азы фæстæ та йæ бафтыдтой иннæ регионты дæр. Ныридæгæн дзы сарæзтой 49 регионалон чемпионаты. Уым архайдтой 5 мин скъоладзау æмæ студентæй фылдæр. Ацы аз Цæгат Ирыстоны регионалон чемпионаты архайджытæ кæндзысты 5 хуызы чъиритæ. Æххуыс сын кæндзысты бархионтæ. Эксперттæ кæсдзысты куыстыты хæрзхъæддзинадмæ æмæ равзардзысты хуыздæрты. Дзæуджыхъæуы базарадон-экономикон техникумы ахуырадон лабораторийы куыстытæ сæ тæмæны бацыдысты. Иутæ цæттæ кæнынц гахæ, иннæтæ змæнтынц хыссæ, цыппар сахаты æмгъуыдмæ сфыцдзысты 5 хуызы чъиритæ, æдæппæтæй 30-æй фылдæр. Сæ арæхстдзинад равдисынмæ ардæм æрбамбырд сты ахуырдзаутæ нæ республикæйы 4 ахуырадон уагдонæй. Хуыздæр чъирифыцæджы ном хæссын алы архайæджы дæр фæнды. Полина Жукова, Мæздæджы механикон-технологон техникумы ахуырдзау: «Ахæм ерысты æз фыццаг хатт архайын. Мæн рагæй фæнды дæсны хæринаггæнæг суæвын, фæлæ ирон чъиритæ кæнын æрæджы райдыдтон. Мæ зæрдæмæ цæуы, «Абилимпикс»-ы кæй ис æппæт фадæттæ ног зонындзинæдтæ райсынæн æмæ хæринаггæнæджы дæсныйады сусæгдзинæдтæ базонынæн. Мæ зæрдæ дарын, цы чъиритæ скæнон, уыдон æппæт домæнтæн дӕр дзуапп кæй дæттдзысты, ууыл. Ахæм егъау чемпионаты архайын мæнæн йæхæдæг уæлахиздзинад у.» Йе `нæниздзинад хъыгдæрд кæмæн у, уыцы адæймæгты 'хсæн 4-æм регионалон чемпионаты скъоладзаутæн æмæ студенттæн æххуыс кæнынц 50 бархионы. Уыдон Цæгат Ирыстоны педагогон институты ацыдысты сæрмагонд ахуыртæ. Конкурсантты арæхстдзинадæн аргъ кæнынц 75 эксперты. Кæсдзысты куыстыты хæрзхъæддзинадмæ æмæ равзардзысты хуыздæрты. Ирон чъиритæ фыцыны дæсныйады эксперт Багаты Зæлинæ куыд фæнысан кодта, афтæмæй архайджытæ иуылдæр хорз цæттæгонд сты. Цæгат Ирыстон чемпионат «Абилимпикс»-ы архайы 2017-æм азæй. Йæ дæсныйад равдисын кæй фæнды, уыдоны нымæц азæй азмæ фылдæр кæны. Уыимæ ма дзы цы дæсныйæдты ис бацархайæн, уыдоны хыгъд дæр. Кæд æртæ азы размæ ерысты архайдтой 42 адæймаджы 8 компетенцимӕ гӕсгӕ, уæд абон чемпионаты фæзтыл сæ арæхстдзинад æвдисынц 87 адæймаджы 12 дæсныйады хуызы. Се `хсæн ирон чъиритæ фыцыны арӕхстдзинад дæр. Ирон чъиритæ фыцыны дӕсныйад Цæгат Ирыстоны регионалон ерысты ис йæ райдианæй. Чемпионаты регионалон центры разамонæг куыд бафиппайдта, афтæмæй ацы компетенцийы бацархайын кæй фæнды, уыцы регионты нымæц дæр æрвылаз рæзы. Хуыздæр ирон чъиритæ чи скæна, уый йæ дæсныйад равдисдзæн Националон чемпионаты Мæскуыйы. Уæлахиздзаутæ хорзæхгонд æрцæудзысты кады гæххæттытæй æмæ æхцайы премитæй. Уымæй уæлдай ма зæрдылдарæн лæвæрттæ æмæ сæрмагонд призтæй. Дзæдзойты Фатимæ  _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv