Цæгат Ирыстоны Алайнаг гимназы райдыдта ног ахуыры аз

Фыццаг дзæнгæрæг азæлыд алайнаг гимназы дæр. Ног ахуыры азы райдианы фæдыл æрæмбырд сты сабитæ, сæ ныййарджытæ æмæ ахуыргæнджытæ. Æмдзæвгæтæ, сценкæтæ, сабитæ бацæттæ кодтой цымыдисаг программæ. Арфæйы ныхæстæ ахуырдзаутæн ракодта нæ республикæйы сæргълæууæг Битарты Вячеслав. Куыд фæбæрæг кодта, афтæмæй йæ ныфс ис, гимназы рауагъдонтæй зындгонд ахуыргæндтæ кæй рауайдзæн. Aлайнаг гимназ байгом 2017 азы. Уæдæй абонмæ сывæллæттимæ куыст цæуы æрмæст иронау. Ахуыргæнæндоны сабитæ сты райсомæй изæрмæ. Фадат сын ис куыд бындурон, афтæ уæлæмхасæн ахуырад райсын дæр. Архайынц алыхуызон сфæлдыстадон къордты. Ныртæккæ дзы ахуыр кæнынц 1-æм къласæй 4-æм къласы онг сабитæ. Ног ахуыры азы райдианмæ æхъæлмæ кастысты куыд скъоладзаутæ, афтæ ахуыргæнджытæ дæр. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv