Æппæтуæрæсеон адæмон фронты уæнгтæ сбæрæг кодтой Дзæуджыхъæуы скъолаты хæрæндæтты уавæр

Æппæтуæрæсеон адæмон фронты уæнгтæ бæрæг кæнынц, Дзæуджыхъæуы скъолаты тæвд хæринаг сабитæн куыд цæттæгонд цæуы, уый. Æркастысты, Уæрæсейы фæлхасгæнджытæм цæстдарды управленийы домæнтæ куыд æххæст кæнынц, уымæ дæр. Æппæт скъолатæн дæр ис аходæны иумӕйаг хыгъд. Ныййарджыты фæрстытæн дзуапп раттыны тыххæй адæмон фронты уæнгтæ бабæрæг кодтой Дзæуджыхъæуы 48-æм скъола æмæ 5-æм гимназ. Ахуыры азы райдианæй мæй дæр нæма рацыд, афтæмæй иуæй-иу ныййарджытæ скъоладзауты хæрдæй разы не сты. Хъаст бахæццæ Æппæтуæрæсеон адæмон фронты штабмæ дæр. Зæгъгæ дам Дзæуджыхъæуы 5-æм скъолайы сабиты аходæн вæййы уазал. Активисттæ æвæстиатæй ахуыргæнæндон бабæрæг кодтой. Скъолайы хæрæндоны ис 300-йы бæрц бынаты. Абоны менюйы — макъаронтæ карчы дзидзаимæ, компот æмæ дыргътæ. Адæмон фронты эксперттæ хъæндзинæдтæ нæ рабæрæг кодтой. Бæстыхæйттæ сты сыгъдæг, хæринæгтæ та — хъарм. Кæд фæндзæм гимназы хъарм хæринаг мин сабийы хæрынц, уæд 48-æм скъолайы та æрмæст æртæ сæдæ. Уый тыххæй ам хæринаг тæвдæй æрæвæрыны фадат дæр ис. Сабитæй чидæр дзидза уарзы, чидæр кас. Бирæтæ та кæсаг. Хæринаггæнджытæ куыд зæгъынц, афтæмæй йæ тæбæгъ чи раафтид кæны, уыцы скъоладзаутæ фылдæр вæййынц. Хæрæндоны куыстмæ ам дæр фиппаинæгтæ нæ рабæрæг. Æппæтуæрæсеон адæмон фронты уæнгтæ æрмæст хъæстыты фæстæ нæ бæрæг кæнынц скъолаты хæрæндæтты куыст. Хъарм хæринаг ахуыргæнинæгтæн куыд дæттынц, уымæ сæ хъус дарынц æппынæдзух. Ацы ахуыры аз дæр ацы куыст алы къуыри кæндзысты республикæйы æппæт скъолаты. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv