Сергей Меняйло бабæрæг кодта Æрыдоны районы сæйраг рынчындон

Цæгат Ирыстоны сæргълæууæджы хæстæ рæстæгмæ æххæстгæнæг Сергей Меняйло дарддæр цæуы кусæг балцыты республикæйы районтæм. Бабæрæг кодта Æрыдон. Федта районы рынчындон. 2019-æм азы байгом бындурон цалцæджы фæстæ. Регионы разамонæг аныхас кодта пациенттимæ дæр. Рынчынтæ хъаст нæ ракодтой, сæ ныхæстæм гæсгæ, медицинон æххуыс ам у бæрзонд æмвæзадыл. Сергей Меняйло базонгæ Æрыдоны районы рынчындоны куысты фæткимæ. Медицинон уагдон бындурон цалцæджы фæстæ байгом 2019-æм азы. Ныртæккæ ам ис авд хайады. Æмткæй райсгæйæ, 126 хуыссæн бынаты. Регионы разамонæгæн ахсджиаг у, цæрджыты хъуыды базонын. Сергей Меняйло аныхас кодта пациенттимæ. Базыдта уавæртæй разы сты æви нæ. Цавæр къуылымпыдзинæдтимæ æмбæлынц рынчындоны уæвгæйæ, уымæй дæр сæ бафарста. Рынчынты ныхæстæм гæсгæ, ам цы медицинон лæггæдтæ исынц, уыдон бæрзонд æмвæзадыл æвæрд сты. Дохтыртæ дæр сæм кæсынц хорз цæстæй. Уымæй уæлдай загътой, ам сын кæй дæттынц æппæт хъæугæ хостæ. Рынчындоны разамонæг Сергей Меняйлойæн равдыста ног стоматологон хайад дæр. Байгом æй кодтой ацы аз мартъийы. Ам районы цæрджыты бон у лæггæдтæ райсын медицинон фæдзæхстадмæ гæсгæ. Дарддæр фæнд кæнынц лæггæдты нымæц фæфылдæр кæнын. Регионы разамонæгæн радзырдтой, дзæбæхгæнæндоны хирургийæйы службæ дæр нырыккон домæнтæн дзуапп кæй дæтты, уый тыхххæй. Ацы хайады фыццаг хатт лапароскопийæйы фæрцы ацы аз операци скодтой мастæн. Тагъд рæстæджы рынчындоны байгом кæндзысты нырыккон иртасæн лаборатори. Сергей Меняйло фæнысан кодта, районы рынчындæтты хъуамæ, æнæмæнг, кæй уа компьютерон томографи кæнынæн кусæнгæрзтæ. Цæгат Ирыстоны сæргълæууæджы хæстæ рæстæгмæ æххæстгæнæг Сергей Меняйло дарддæр цæудзæн кусæг балцыты республикæйы рынчындæттæм. Йæ ныхæстæм гæсгæ, цæрджытæн хъуамæ уа æппæт уавæртæ дæр хæрзхъæд медицинон лæггæдтæ æххæстæй исынæн, уымæн æмæ медицинон къабаз республикæйæн у йæ раззагдæртæй иу. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv