Литературон ерысты уæлахиздзаутæ сбæрæг сты

Фыдыбæстæйæн кад чи кæндзæн æмæ мадæлон æвзаг чи хъахъхъæндзæн, ахæм фæсивæды хъомыл кæнын. Уыцы нысан сæ размæ сæвæрдтой республикæйы æфсæддон-патриотон хъомылады центры кусджытæ. Ныр 4 азы дæргъы расидынц литературон ерыс фæсивæды `хсæн хуыздæр аив дзырды дæснытæ равзарынæн. Ацы аз æркасты разынд бирæ курдиатджынтæ уыдис. Сæ фыст уацмыстæй рауад нырыккон аргъæутты чиныг. Фыдыбæстæйы Стыр хæст куы фæци, уæдæй рацыд 75 азы. Рахъомыл сты хæсты фæстæ гуырд фæлтæртæ æмæ уыдоны цот. Ирыстоны алы бинонтæ дæр фæлтæрæй-фæлтæрмæ хæстон фæндæгтимæ баст цаутæ цæсты гагуыйау хъахъхъæнынц. Гусаты Давид дæр зоны йæ фыдæлты сгуыхтдзинæдтæ æмæ сæ сæрыстырæй нымайы адæмон хъайтартыл. Конкурсмæ нывæцæн дæр ныффыста уыдоныл. Нæ республикæйы æфсæддон-патриотон хъомылады центры мадæлон æвзаг хъахъхъæныныл æмæ райрæзтыл фыццаг аз нæ архайынц. Ерыстæ сарæзтой ныр 4-æм хатт. Фæархайы дзы 35 азы онг æрыгон фæлтæр. Курдиат равдисыны фадат фестивалы ис æрмæст ирон æвзагыл. Адæмон хъайтарыл нывæцæн ныффысынæй дарддæр ма арæхстдзинад равдисæн уыдис фыдыбæстæйы тыххæй æмдзæвгæ æмæ сабитæн фыст нырыккон аргъауæй. Æрыгон архайджыты уацмыстæ мыхуыргонд æрцæудзысты сывæллæтты журнал «Ногдзау»-ы фæрстыл. Йæ рауагъды редактор Сæлбиты Дианæ куыд фæбæрæг кодта, афтæмæй журналкæсджытæ сты зонгæ раздæры азты фестивалты уæлахиздзауты курдиатимæ дæр. Уымæй уæлдай ма мадзал аразджытæ рауагътой фестивалы хуыздæр аргъæутты æмбырдгонд. Чиныгæн стыр аргъ скодтой фестивалы тæрхонгæнджытæ. Жюрийы сæрдар, фыссæг Касаты Аслæнбегæн дæр чиныг йæ зæрдæмæ фæцыд. Нæ республикæйы æфсæддон-патриотон хъомылады центры архайынц æрмæст æвзаг бахъхъæныныл нæ, фæлæ ма, фидæны нæ адæмæн æмæ фыдыбæстæйæн кад чи кæндзæн, ахæм фæсивæды схъомыл кæныныл. Дзæдзойты Фатимæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv