Программæ «Старшее поколение» йы архайджытæ, профессионалон ахуырад чи райста, уыдон кусынц ног дæсн

Кæд сыл 50 азæй фылдæр цæуы, уæддæр тырнынц ног дæсныйад райсынмæ. Радон къорд Æрыдоны бирæвæрсыг колледжы ацыд ахуыртæ компетенци «Электромонтаж»-мæ гæсгæ. Уыимæ ма æнтыстджынæй радтой кæронбæттæны фæлварæн. «Хистæр фæлтæр», зæгъгæ, федералон проектмæ гæсгæ ахуыртæ цæуынц профессионалон цæттæдзинадæй, фæлтæрддзинад бæрзонддæр кæнынæй. Бæлвырддæр нæ дарддæры æрмæджы. 16 азæй фылдæр Чертыхъоты Зæирæ автомобилон транспортон компанийы фæкуыста бухгалтерæй. Æгуыстæй куы баззад, уæд сфæнд кодта йæхи ног куысты бафæлварын. Сылгоймаг сразы ис чъиритæ фыцæгæй бацæуынмæ. Куыд радзырдта, афтæмæй уайтагъд сразы. Цæмæй йæ фæлтæрддзинад фæбæрзонддæр кæна, уый тыххæй сфæнд кодта ахуыртæ ацæуын. Гаглойты Светланæ пенси ныр 6 азы исы. Раздæр куыста аразæгæй. Куыд радзырдта, афтæмæй æгуыстæй хæдзары бадын йæ бон не сси. Ахуыртæ ацæуæн кæй ис, уый куы фехъуыста, уæд йæхицæн зæрдæмæдзæугæ къабаз равзæрста. Æмæ ныр хуыйы хъæццултæ, базтæ æмæ гобæттæ. Æрыгонæй Светланæ ацы куысты хи фæлвæрдта. Фæлæ уæдæй абонмæ йæ дæсныйадмæ гæсгæ нæ куыста, уый тыххæй йæ бафæндыд йæ зонындзинæдтæ сног кæнын. Ног дæсныйад райсын сылгоймæгты къухы бафтыд сæрмагонд проекты руаджы. Снысан æй кодтой, цæмæй пенсийы агъоммæ адæм ног профессионалон ахуырад исой. Йæ райрæзтыл кусынц национ проект «Демография»-йы фæлгæты. Цæгат Кавказы аграрон-технологон колледжы бындурыл ивгъуыд аз ног дæсныйад райстой 645 адæймаджы. Ацы аз фæнд кæнынц 300 специалисты бацæттæ кæнын. Алкæмæндæр йæ бон у зæрдæмæдзæугæ къабаз равзарын. Зæгъæм, электромонтажник, модæйы технологи, ирон чъиритæ фыцын æмæ компьютерон дизайн. Ацы аз ахуырты фыццаг къæпхæн ахицæн. Сентябры дыккаг райдайдзæн. Программæмæ гæсгæ ахуыртæ уыдзысты 2 къуырийæ 2 мæйы онг. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv