Фæсивæды галуаны цæуы фестиваль «Студентон уалдзæг»

Мидисджын ныхæстæ, актерты ирд архайд æмæ хъайтарты æцæг æнкъарæнтæ. Дзæуджыхъæуы цæуы æрвылазон фестиваль «Æппæтуæрæсеон студентон уалдзæг». Театралон равдыстытæ бацæттæ кодтой 20 къордæй фылдæр - æппæт республикæйы минæвæрттæ. Фæсивæдæн мадзал дæтты сæ курдиат раргом кæныны фадат. Ацы хатт студентон уалдзæгæн уыд патриотон темæ. Хæсты фыд азтæ сценæйыл раст цыма профессионалон актертæ æвдисынц, ахæм хорз сын уайы. Алагирæй рацæугæ æрыгон ахуыргæнæг Баситы Чабæханы тыххæй равдыст адæмы зæрдæмæ фæцыд. Фыдыбæстæйы Стыр хæсты рӕстӕг æвзонг чызг равдыста æцæг хъæбатырдзинад. Райгуырæн зæххыл гадзрахатæй рацæуны бæсты равзæрста мæлæт. Республикæйæ 24 студентон къорды. Уыдонæй 17 — колледжтæ, 6 та — уæлдæр ахуыргæнæндæттæ. Фæсивæд сæ арæхстдзинад равдисдзысты 4 номинацийы : Театралон, музыкалон, кафты хуызтӕ æмæ хивзæрст жанртæ. Æдæппæтæй равдисдзысты 270 сфæлдыстадон номыры. Сæ тематикæ иу — патриотон уæлахиз. Иу ерыс та ма аивадуарзджыты 'хсæн. Алкæйы дæр фæнды, цæмæй йæ ахуыргæнæндон хуыздæрыл банымайой. Архайджытæн студентон уалдзæг у ахсджиаг. Цæттæ кæнын æм райдайынц рагацау. Фæсивæды цæттæдзинадæн аргъ кæны жюри. Кæсынц алы лыстæг хъуыддагмæ дæр. Уæлæдарæс, декорацитæ, музыкæ æмæ актеры дæсныдзинадмæ. Мадзаларазджытæ — фæсивæды хъуыддæгты фæдыл комитет. Конкурс ма ахæсдзæн дыууæ боны. Кæронбæттæны - гала-концерт. Студентон уалдзæджы хатдзæгтæм гæсгæ бацæттæ кæндзысты республикæйы иугонд командæ. Уый дарддæр архайдзæн æппæтуæрæсеон æмвæзады. Калоты Дзерассæ