Цæгат Ирыстоны пъæлицæйæгтæ сидынц адæммæ, цæмæй цæстфæлдахджыты фæлитой митыл ма ууæндой

Цæгат Ирыстоны пъæлицæйæгтæ сидынц адæммæ, цæмæй цæстфæлдахджыты фæлитой митыл ма ууæндой. Ацы бонты закъонхалджытæ сылгоймаджы банчы картæ раафтид кодтой 100 мин сомы бæрц. Æххуысагур барадхъахъхъæнджытæм фæсидт 52-аздзыд бынæттон цæрæг. Куыд фæхабар кодта, афтæмæй йæм чырæ телефонмæ æрбардзырдæуыд, æмæ дзурæг йæхи бацамыдта куыд банчы кусæг, афтæ. Сылгоймаджы фæсайдтой, ома йæ картæйы фæрцы кæйдæр фæнды кредит райсын, зæгъгæ. Цæмæй йыл ахæм ми ма ’рцæуа, уый тыххæй йæм бахатыд, æмæ йын йæ банчы картæйы сæрмагонд информаци радзурын кодта. Куы сæ раргом кодта, уæд æвиппайды йæ картæйæ ист æрцыд 99 мин æмæ 700 сомы, йæ номыл та кредит ист сæдæ мин сомыл. Ацы цауы фæдыл барадхъахъхъæнджытæ байгом кодтой уголовон хъуыддаг. Ныридæгæн аразынц агурæн мадзæлттæ. Мидхъуыддæгты министрады кусджытæ сидынц адæммæ, цæмæй сыл ахæм сайд ма ’рцæуа, уый тыххæй нæ хъæуы дзурын хи бæрæггæнæнтæ, зæрдæхсаинаг хъусынгæнинæгтæн та дзуапп дæттын. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv