Программæ «Борьба с бедностью» йы фæлгæты Цæгат Ирыстоны цæрджытæн кæнынц социалон куыст

Раздзоджы дарддæр æххæст кæнынц мæгуырдзинады ныхмæ арæзт программæ. Йæ авналæнтæ цыбыр кæмæн сты, ахæм бынæттон цæрджытæн байуæрстой стурвос. Проектмæ гæсгæ, бинонтæй иу адæймагæн йæ æфтиæгтæ фæцæрынæн æхцайы æппынкъаддæр бæрцæй къаддæр куы уой, уæд сын ахæм æххуыс уыдзæн ахадгæ. Республикæйы фæллой æмæ социалон рæзты министрады куыд фæнысан кодтой, афтæмæй алы бинонтимæ дæр фыст æрцыд социалон бадзырд. Фосы мыггаг ис сæрмагонд хыгъды, ис сын конд прививкæтæ æмæ цӕттӕ фæдзæхстадон гæххæттытæ. Æхсыры продукци ныр цæрджытæм ис, канд сæхи нæ, фæлæ ма уæй кæныны фаг дæр. Уымæй уæлдай сæм ныридæгæн фæзынди родтæ дæр. Хъæууон хæдзары бирæ куыст ис. Цæхæрадон, фос. Къозаты бинонтæ-иу сæ зæххы хайыл кæддæриддæр ӕрӕмбырд кодтой бирæ тыллæг, фæлæ фос никуы дардтой. Фадат сын нæ уыди. Социалон программæмæ гæсгæ стур райсдзысты, уый куы базыдтой, бынат дæр уæд райдыдтой аразын. Ивгъуыд аз мæгуырдзинады ныхмæ тохы программæйы фæлгæты нæ республикæйы цæрджытæн, йæ авналæнтæ кæмæн куыд амонынц æмæ хæдзары цал бинойнаджы цæры, уымæ гæсгæ радтой стуртæ - иу кæнæ дыууæ. Ацы программæ хорзы ‘рдæм кæй ахады адæмы царды уавæртыл, уымæн æвдисæн сси хъæу Раздзог. Ныртæккæ фосыл се 'ппӕтыл дӕр бафтыд. Хъомты цур ныр ис родтæ. Сæ иутыл нырма цæуы мæйы бæрц. Ис дзы, афæдзмæ хæстæг кæуыл цæуы, ахæмтæ дæр. 20 фæкæсинаг бинонтæй 14 хæдзарæры хицæутты бафæндыд сæхи хæдзарад райрæзын кæнын. Уымæ гæсгæ сын сæ царды уавæртæ фæхуыздæр кæныны тыххæй балæвар кодтой 25 стуры сырхбыдырон мыггагæй. Ацы фос сын ныридæгæн æххуыс у сæхицæн æхсыры продукци амал кæнынæн. Ныр афӕдзӕй фылдæр хи конд урсаг фынгыл кæй æрæвæрынц, уый хъæуы цæрджытæн ахсджиаг хъуыддаг у. Уымæй уæлдай ма сæ бон у уæй кæнын æхсыр, къæдор, цыхт. Теблойты Риммæйæн дæр программæйы фæлгæты раттой 2 стуры. Нæ республикæйы фæллой æмæ социалон райрæзты министрады æппынæдзух цæттæ сты æххуыс бакæнынмæ. Адæмимæ бӕстон ныхас кæнынц, амонынц сын æппæт лыстæгдзинæдтæ. Проектæн ис иу домæн - хъуамæ бинонтæ ацы стуртæ бахъахъхъæной æмæ сӕ фæдарой 5 азы дæргъы. «Борьба с бедностью», зæгъгæ, проекты райрæзт у социалон къабазӕн йӕ ахсджиагдæртæй иу. Проекты сæйраг нысан - æххуысцух бинонтӕн сӕ царды уавæртæ фæхуыздæр кæнын. Программæйы райрæзтыл кусынц 4 ведомствæйы. Фæллойады, Экономикæйы райрæзты, хъæууон хæдзарады министрадтæ æмæ куыстдæттыны комитет. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv