Президенты гранттæ Цæгат Ирыстоны рамбылдтой 5 æнæкоммерцион уагдоны

Президенты грантты фонды 2-аг конкурсы архайджыты ’хсæн Цæгат Ирыстоны 5 æнæкоммерцион уагдоны систы уæлахиздзаутæ. Иумæйагæй рамбылдтой 9 милуан 500 мин сомы. Президенты фонды грант чи райста, уыдоны ’хсæн цæгатирыстойнаг интеллектуалон клуб «Альбус». Рахай йын кодтой 3 милуан соммæ ввахс. Сæ проект «Брейн-новости» эфирмæ цæудзæн алы къуыри. Исдзысты цымыдисаг æрмæджытæ фæсивæды курдиатджын минæвæртты тыххæй. Алыхуызон къабазы йæхи хорз чи равдиса, уыдоны тыххæй хъусын кæндзысты телеуынынады фæрцы. «Нымадæй ацы грант махæн у 9-æм. Интеллектуалон хъæзтытæ апарахат сты æмæ æнтыстджынæй рæзынц нæ республикæйы 8 районы. Кæм архайæм, уыцы бынаты нын ис хъæугæ кусæнгæрзтæ. Æппæт уавæртæ дæр сарæзтам, цæмæй районты ацы хъазт рæза. Уый тыххæй нын грант рахай кодтой. Бирæ пълæнттæ нæм ис. Кусдзытæм, цæмæй æххæстгонд æрцæуой», - интеллектуалон клуб «Альбус»-ы президент Бориты Жаннæ. Æнæкоммерцион организаци «Лоскутное одеяло»-йæн та рахай кодтой 760 минмæ `ввахс. Аутизмæй рынчын сывæллæттæн бацæттæ кæндзысты æххуысгæнджыты. Проект æххæстгонд æрцæудзæн Дзæуджыхъæуы 26-æм скъолайы бындурыл. «Ахæм сывæллæттæм хъæуы уæлдай цæстдард æмæ хуыздæр зылд. Уæвгæ сæ алцæуылдæр ис сахуыр кæнын. фæлæ, иннæтимæ абаргæйæ, сæ ахуырыл фылдæр рæстæг бахъæуы. Проекты сæйраг нысан у аутизмæй рынчын сывæллæттæн сæ къласæгтæ æмæ æмбæлттæн бацамонын этикæйы бындурон зонындзинæдтæ æмæ практикон æгъдауæй хидарды фæтк. Уый кæнæм, цæмæй сæ æмбæлттæ æмбарой æмæ сын бæххуыс кæнын хъом уой. Цæмæй семæ архайой спорты дæр, ахуыры дæр. Проектмæ гæсгæ, сын мах бацæттæ кодтам тренингтæ, æвдисдзыстæм сын мультипликацион кинонывтæ. Ахуыры азы дæргъы цæудзыстæм музейтæм æмæ равдыстытæм», - æнæкоммерцион организаци «Лоскутное одеало»-йы разамонæг Икъаты Мæдинæ. Хи сæрмагонд-культурон куыстуат «Благодать»-æн та рахай кодтой 2,5 милуан сомы. Архайдзысты Ирыстоны æрмдæсныйæдтæ бахъахъхъæныныл. Проекты сæйраг нысан - нымæт цæгъдын æмæ цыллæ кæлмæрзæнтæ бийын чи зоны, ахæм сылгоймæгты нымæц фæфылдæр кæнын. «Проекты сæйраг хæс у - ацы дæсныйад фæстæмæ раздахын. Кæддæр нымæтимæ архайын Ирыстоны алы сылгоймаг дæр зыдта. Фæлæ, хъыгагæн, нырыккон царды ацы куыст рохуаты баззад. Нæ республикæйы ацы æрмдæсныйад традицион у. Кæмæндæр у зонгæ йæ сабибонтæй фæстæмæ, чидæр та йыл ахуыр кæны ныртæккæ. Фæлæ алкæмæндæр у цымыдисаг. Ахуыр кæндзыстæм бийын хызынтæ, хæдзарон дзабыртæ, æмæ æндæр цымыдисаг дзаумæттæ», - проект «Национальная школа войлока»-йы разамонæг Бзарты Аланæ. Проектты уæлахиздзауты нымæц азæй-азмæ рæзы. Уый та ууыл дзурæн у, æмæ йæ кусты мидæг размæ цæуын кæй фæнды, ахæм адæмы нымæц фылдæрæй-фылдæр кæны. Пелиты Сæбинæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv