Абон Уæрæсейы бæрæг кæнынц социалон кусæджы бон

Фыццаг бакастæй гæнæн ис æмæ адæймагмæ фæкæса, социалон кусæг суæвын алкæй бон дæр кæй у. Хойрæгтæ балхæн, рафснай, хостæм ауай, коммуналон лæггæдтæн бафид æмæ фæци. Фæлæ афтæ нæу. Социалон кусæг, фыццаджыдæр, у сыгъдæгзæрдæ, кæддæриддæр æххуысмæ цæттæ адæймаг. Ацы дæсныйады ахсджиаг у, де 'ххуыс кæй хъæуы, уый зæрдæйы уаг æмбарын. Ахæм адæймаг у Беслыхъоты Аринæ. Ацы къабазы ныридæгæн кусы 6 азы. Æрвылбон 9 сахатыл Беслыхъоты Аринæ æнæзивæгæй араст вæййы, йе 'ххуысмæ йын чи æнхъæлмæ кæсы, уыдонмæ. Абон фыццаджыдæр бабæрæг кодта Гаситы Зарæйы. Сылгоймаг 42 азы фæкуыста финансты министрады. Фæлæ йыл уæззау хабар ауад, йӕ хъæбулы зиан ыл ӕрцыд. Уæд райдыдта цудын йе 'нæниздзинад дæр. «Бирæ йæ уарзын!», зæгъгæ, фæзæгъы Зарæ. Аринæ йын у хи бинойнагау адджын. Зонгæ сты ныр 6 азы. Бонмæ Аринæ бабæрæг кæны 3 пенсиисæджы. Алкæмæндæр æххуыс кæны зæрдиагæй. Куыд зæгъы, афтæмæй йæ куысты зынæй ницы ис. Рафснай, бырон акал, афæрс ацæргæ адæймаджы йе 'нæниздзинадæй, йæ туджы æлхъывдвд дæр ын абар. Сæ фылдæр сты иунæджытæ, æмæ сæ фæфæнды аныхæстæ кæнын. Афæрсынц, дуканийы цы æргътæ ис, боныхъæд куыд у. Æрмæст сын, Аринæ куыд зæгъы, афтӕмӕй хъæуы барын æмæ сæ уарзын. Аринæйы хуызæн сыгъдæгзæрдæ адæм æвæллайгæйæ æххуыс кæнынц æххуысцух адæмæн сæ зын уавæрты. Æрвылбон тагъд кæнынц ацæргæ адæммæ, се 'нæниздзинад хъыгдæрд кæмæн у, кæнæ мæгуырдзинад чи бавзæрста, уыдонмæ. Дзæдзойты Фатимæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv