Тæмискъмæ фæхæццæ кæны тагъдкусгæ интернет

21 æнусы æнæ интернет æмæ бастдзинадæй адæм къуылымпыдзинæдтæ æййафынц. Нырыккон царды паддзахадон лæггæдты фылдæр хай сты онлайн хуызы. Пандемийы рæстæг ахуырад дæр цæуы дистанцион хуызы. Тæмисчъы цæрджытæ абоны онг нырыккон технологитæй уыдысты цух. Адæм æххуысагур цыдысты профилон ведомствæтæм, суанг ма республикæйы сæргълæууæгмæ дæр. Ныр адæмы стырдæр бæллиц сæххæст уыдзæн. Поселоччы тагъд фæзындзæн интернет. Бекъойты Зæирæйæн æхсызгон у поселоччы интернет кæй фæзындзæн, уый. Цæрджытæ нырыккон технологтæм тынг æнхъæлмæ кастысты. Интернеты руаджы царды нырыккон домæнтимæ æмдзу кæндзысты. Поселоччы интернет апарахат кæнынæн æрсагътой цæджындзтæ. Аивæзтой сыл сæрмагонд телтæ. Куыстытæ йæхи хардзæй баххæст кодта компани «Ростелеком»-ы цæгатирыстойнаг филиал. Евгений Гальцев, ПАО «Ростелеком»-ы цæгатирыстойнаг филиалы директор: «Тæмисчы куыстытæ бакодтам къæпхæнгай. Бынæттон цæрджытæ куы федтой, мæ фæстæ цы объект ис, ууыл кусæм, зæгъгæ, уæд нæм сæ курдиатимæ æрбацыдысты. Фыстой нæм социалон хызæгты, дзырдтой телефонæй. Куырдтой, цæмæй сæм интернет бауадзæм. Тагъд нын нæ рауад уыцы хъуыддаг бакæнын. Фæлæ йыл уæддæр бакуыстам æмæ йæ нæхи фæрæзтæй бакодтам. Арæзтадон куыстытæ ныридæгæн фестæм. Баззад мы нын цæрджыты хæдзæрттæм телтæ бауадзын». Тæмисчъы цæрджытæм ног къуыри фæзындзæн тагъдкусгæ интернет – секундмæ 100 мегабитæй уæлæмæ тагъдадимæ, уыимæ ма интерактивон телеуынынад. Сæ бон пайда кæнын уыдзæн «Ростелеком»-ы æппæт лæггæдтæй дæр. Куыстытæ куыд цæуынц, уый сбæрæг кодта республикæйы информацион технологитæ æмæ бастдзинады управленийы разамонæг Сæлбиты Алан. Поселоччы хæдзæрттæм интернеты телтæ бауадздзысты ног къуыри. Афтæмæй, нырыккон технологитæй Тæмисчы пайда кæндзысты 22 хæдзары. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv