Æппæтуæрæсеон адæмон фронты регионалон хайады уæнгтæ æмæ паддзахадон автоинспекцийы кусджытæ сарæзто

Æппæтуæрæсеон адæмон фронты регионалон хайады уæнгтæ æмæ паддзахадон автоинспекцийы кусджытæ абон сарæзтой рейд «Дорога в школу», зæгъгæ. Бæрæг кодтой скъоладзауты æдас балцвæндаг. Цавæр хатдзæгтæм æрцыдысты æмæ сыл дарддæр кæимæ бакусдзысты, уый тыххæй нæ дарддæры æрмæджы. Къесаты Астаны номыл уынджы 41-æм скъоламæ ныййарджытæ сæ сывæллæтты цы фæндæгтыл ахонынц, уыдонæй сæ-иу æмбæлгæ домæнтæн дзуапп нæ дæтты. Хистæрты ныхæстæм гæсгæ, уарынты рæстæг фæндаг сцъымара вæййы æмæ йыл зын ацæуæн вæййы. Æппæтуæрæсеон адæмон фронты уæнгтæ ацы фарстайы фæдыл фарон сæ хъаст бахастой Дзæуджыхъæуы администрацимæ. Уым сын зæрдæ бавæрдтой, фарста ацы ахуыры азы райдианмæ кæй аиуварс кæндзысты, уый. Фæлæ хъуыддаг йæ бынатæй нæ сызмæлыд. Мониторингы архайджытæ дарддæр абалц кодтой Дзæуджыхъæуы 16 скъоламæ. Сæ цæст æрхæцыд, скъоламæ хæстæг фæндагыл бордюртæ кæй нæй, ууыл. Уыимæ ма дзы нæй шофыртæн хъæуыгæ нысæнттæ. Рейды рæстæг ма абалц кодтой Дзæуджыхъæуы 18-æм микрорайоны ног скъола «Эрудит»-мæ. 2 къуырийы размæ йæ алфамблай нæ уыд æмбæлгæ тротуартæ. Ныридæгæн сæ райдыдтой аразын. Хæстæгдæр рæстæг куыстытæ кæронмæ баххæст кæндзысты. Абоны рейды хатдзæгтæ æрвыст æрцæудзысты Дзæуджыхъæуы администрацимæ. Дарддæр сыл уыдон хъуамæ бакусой. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv