Цæгат Ирыстонмæ ссыд Уæрæсейы президенты æххуысгæнæг Максим Орешкин

Цæгат Ирыстонмæ кусæг балцы ссыд Уæрæсейы президенты æххуысгæнæг Максим Орешкин. Йе 'ссыды сæйраг нысан регионы инвестицион программæйæн аргъ скæнын. Федералон уазджытæ бабæрæг кодтой бирæ объекттæ. Се 'хсæн, ныртæккæ кæй аразынц, ахæмтæ дæр. Федтой ма фермерон хæдзарадтæ, футболы академи «Алани». Аргъ скодтой ахуарадон-хъомыладон архайдæн. Хицауады уæнгтæ ма сæ фæндаг ракодтой центр «Баспик»-ыл дæр. Бынаты æрдзырдтой республикæйы промышленнон кондадыл. Уæрæсейы президенты æххуысгæнæг Максим Орешкин, фыццаджыдæр, бабæрæг кодта Беслæны мемориалон комплекс «Зæдты сахар». Æрымысыдысты фыдбылызы амæттæгты æмæ хъайтарты нæмттæ. Республикæйы хицауады сæрдары хæстæ рæстæгмæ æххæстгæнæг Тускъаты Таймуразимæ цыртдзæвæныл сæвæрдта дидинджытæ. Уымæй уæлдай ма делегаци уыд Беслæны фыццæгæм скъолайы спортивон залы. Ам æрцыд, сæдæгай удтæ чи ахаста, уыцы судзаггаг фыдбылыз. Дарддæр Сергей Орешкин федта Архонкæйы станицæйы «Долина спаржи», зæгъгæ, фермерон хæдзарад. Куыстуаты инвестор Реуазты Валерий федералон уазджытæн равдыста, республикæ хуыр цы зайæгойтæм нæу, уыдон куыд рæзынц, уый. Бæстонæй радзырдта, спаржæ куыд æмбырд кæнынц æмæ йæ зианхæссæг хъæндилтæй куыд хъахъхъæнынц, уый тыххæй. Уымæн сын æххуыс сты нырыккон технологитæ. Афæдзмæ — продукцийы 100 тоннæйы, 12 хуызы, 70 гектары. Уыдон сты куыстуаты бæрæггæнæнтæ. Хойрагæн æлхæнæг ис, æмæ уымæ гæсгæ архайдзысты йæ райрæзтыл. Компанийы руаджы ма куысты бынæттæ фæзынд 60 адæймагæн. Максим Орешкин куыстуаты архайдæн скодта стыр аргъ. Куыд фæнысан кодта, афтæмæй Уæрæсе хъуамæ спаржæйы кондадæй рахиза фыццаг бынæттæм. Суанг ма хъуамæ фæуа Китайы разæй дæр. Æгъдаумæ гæсгæ уазджытыл æртæ чъириимæ сæмбæлдысты футболы академийы. Максим Орешкин базонгæ ис, нæ бæстæйы суинаг футболисттæ цы уавæрты ахуыр кæнынц, уый. Стыр аргъ скодта спортивон комплексы материалон-техникон базæйæн. Ахуырадон-хъомыладон архайдæй дæр баззад разыйæ. Ныртæккæ ам ис 120 æрыгон футболисты. Максим Орешкин се 'ппæтæн дæр ракодта арфæ. Суанг ма дуаргæсæн гол дæр бакъуырдта. Уазджытæ ма федтой раздæры завод «Электроцинк». Республикæйы сæргълæууæджы хæстæ æххæстгæнæг æмæ стратегион хъæппæристы агентады директор Светланæ Чупшеваимæ æрдзырдтой хауæццæгтæ бакусыны мадзæлыл. Регионы разамонæджы хъуыдымæ гæсгæ, дарддæр хъæудзæн сау мæрыл ногæй бакусын. Кусæг балцы рæстæг ма базонгæ сты Дзæуджыхъæуы технологон центр «Баспик»-ы куыстимæ. Уазджытæн экскурси сарæзтой наукон цехты, радзырдтой сын ног проекты тыххæй. Центр у раззагдæр куыстуæттæй иу. Уæрæсейы у иунæг центр, микроканалон пластинæтæ кæм уадзынц, ахæм. Пайда сæ кæнынц космосон æмæ ядерон промышленносты. Сæ продукци суанг æрвитынц Инди, Китай æмæ Германимæ. Кусæг балцы сæйраг нысан — Цæгат Ирыстоны инвестицион программæтæн аргъ скæнын. Федералон уазджытæ сæ программæ дарддæр ахæццæ кæндзысты райсом. Бабæрæг кæндзысты фидæны курорт «Мамысон»-ы фæз. Уазиты Зæлинæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv