Сергей Меняйло федта горæтгæрон районы сæйраг рынчындоны æмæ ахуырадон объектты куыст

Цæгат Ирыстоны сæргълæууæджы хæстæ рæстæгмæ æххæстгæнæг Сергей Меняйло уыд Горæтгæрон районы. Сбæрæг кодта медицинæйы æмæ ахуырады къабæзты куыст. Регионы разамонæг йæ балц райдыдта районы сæйраг рынчындонæй. Сергей Меняйло федта медицинон уагдоны кæрты уавæр, æркаст исæн æмæ хирургийæйы хайадтæм, уыимæ ма операцион блок дæр. Республикæйы разамонæджы хæстæ рæстæгмæ æххæстгæнæг æрдзырдта дзæбæхгæнæндоны кусджытимæ. Медиктæ радзырдтой, мызд æртæ хайæ кæй райсынц, æмæ сын ахæм хуызы ацы системæ къуылымпыдзинæдтæ кæй æрхæссы, уый тыххæй. Сергей Меняйло дзуапдæттæг ведомствæтæн бабар кодта, цæмæй хæстæгдæр рæстæг ацы фарста иуварсгонд æрцæуа. Уыимæ ма иу хатт фæнысан кодта, æнæниздзинад хъахъхъæныны æмæ ахуырады къабæзты мызды системæйæ разы кæй нæу. Сергей Меняйло æркасты рæстæг йæ хъуыды загъта рынчындон медицинон картæтæ электрон хуызы дарыны тыххæй. Республикæйы разамонæджы хъуыдымæ гæсгæ, нымæцон платформæйы руаджы пациент æмæ дохтыры æмархайд фенцондæр уыдзæн. Реанимацийы хайад бабæрæг кæнгæйæ, Сергей Меняйло разыйæ нæ баззад, хайады æрмæст дыууæ улæфæн аппараты кæй ис, уымæй. Дзуапдæттæг министрадæн бабар кодта фарста хæстæгдæр рæстæг аиуварс кæнын. Сергей Меняйло ма базонгæ тагъд медицинон æххуысы диспетчерон центры куыстимæ. Бабæрæг ма кодта Черменыхъæуы дыккæгæм æмæ æртыккæгæм скъолатæ. Уæлдай æргом аздæхта ахуыргæнæдоны техникон цæттæдзинадмæ æмæ, сывæллæттæ цы уавæрты ахуыр кæнынц, уымæ. Уымæй уæлдай ма Сергей Меняйлойæн кусæг фембæлд уыд муниципалон сконды разамонæг Есиаты Русланимæ. Æмбырды æрдзырдтой районы социалон-экономикон райрæзтыл æмæ бюджетыл. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv