Цæгат Ирыстоны ацы азы кæронмæ баивдзысты 100 лифты

Доваторы проспекты 11-æм хæдзары цæрджытæ ныр уæллаг уæладзгуытæм цæудзысты ног лифтыл. Ныртæккæ барæфатерон хæдзары цæуынц цалцæггæнæн куыстытæ. Сæ лифтытæй пайда кодтой къорд азты дæргъы æмæ уыдысты тæссаг уавæры. Ацы бирæуæладзыгон хæдзары куыстытæ сты сæ тæмæны. Лифтытæ ивынц 4 подъезды. Сæ механизмтæ, бæндæнтæ, стæй кабинæтæ уыдзысты ног. Цæрджыты ныхæстæм гæсгæ, сын рагæй ивинаг уыдысты. Мæймæ-иу цалдæр хатты сæ куыстæй æрлæууыдысты. Лифтæй пайда кæныны ’мгъуыд у 25 азы. Ацы бирæфатерон хæдзары лифтытыл ныр цæуы 40 азы. Карачаровы механикон завод канд лифтытæ нæ сæрвыста республикæмæ. Мæскуыйæ ма ссыдысты сæрмагонд кусджытæ дæр. Ныртæккæ уал сты 11-æй. Ацы къуырийы кæрон та ма республикæмæ ссæудзæн 20 специалисты. Къусджытæ архайынц алы бон райсомæй изæрмæ. Кусынц фæлладуадзæн бонты дæр. Æмæ кæд зæронд лифтытыл цæуын бирæтæ нал уæндыдысты, уæд ног лифтытæ дзуапп дæттынц адасдзинады æппæт домæнтæн дæр. Бирæ азты цы лыггæнинаг фарста тыхсын кодта бирæуæладзыгон хæдзары цæрджыты, уый аиуварс кæныныл бацархайдта Сергей Меняйло. Республикæйы сæргълæууæджы хæстæ рæстæгмæ æххæстгæнæг баныхас кодта Карачаровскы механикон заводы разамонæг Дзиуаты Алыксандыримæ. Уый республикæйæн балæвар кодта 100 лифты. Ныридæгæн республикæмæ сластой 49 ног лифты. Хæстæгдæр рæстæг та ма сласдзысты иннæтæ - сты 51. Куыстыты ма цæуынц Къостайы проспекты дæр. Лифтытæ кæм баивдзысты, уыцы хæдзæртты номхыгъдыл бакуыстой Дзæуджыхъæуы разамонæг компанитимæ иумæ. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv