Æхсæнадон палатæйы уæнгтæ бæрæг кæнынц скъолаты хæрæндæтты уавæр

Æхсæнадон палатæйы уæнгтæ бæрæг кæнынц, скъоладзаутæн куыд æмæ цы хæрын кæнынц, уый. 1-æм сентябрæй фæстæмæ алы сывæллонæн дæр дӕттынц тæвд хæринаг. Æппæт скъолатæн дæр ис аходæны иумӕйаг номхыгъд. Специалисттæ куыд бафиппайдтой, афтæмæй хæринаг у хæрзад. Æхсæнадон палатæйы уæнгтæ федтой Дзæуджыхъæуы 13-æм, 28-æм æмæ 29-æм скъолатæ домæнтæ куыд æххæст кæнынц, уый. Дзæуджыхъæуы 29-æм скъолайы хæрæндоны 100 бынатæй фылдæр ис. Ӕрвылбон скъоладзаутæ ам хæрынц хъарм хæринаг - алы бон дæр алыхуызон. Сабитæ разыйæ баззайынц райсомы хæрды фæстæ. Хæринаггæнджытæ куыд зæгъынц, афтæмæй сын æхсызгон вæййы, сабитæ тæбæгътæ куы раафтид кæнынц, уӕд. Раздæр скъоладзаутæ сихоры хæрд кодтой льготæмæ гæсгæ. 2020-ӕм ахуыры азы райдианæй хъарм хæринаг лæвар æмбæлы райдиан кълæсты ахуырдзаутæн се `ппæтæн дæр. Ног домæнтæм республикæйы скъолатæ сæхи цæттæ кодтой бӕстонӕй. Хæрæндæттæ сцалцæг кодтой, сифтонг сæ кодтой хъæугæ кусæнгæрзтæй. Меню аразынц, сывæллæттæ фылдæр цы хæринаг уарзынц, уымæ гæсгæ. Ахуыргæнджытæ куыд зæгъынц, афтæмæй уый ахуырадыл дæр хуыздæры 'рдæм фæбæрæг уыдзæн. Лохты Ларисæ, Дзæуджыхъæуы 29-æм скъолайы директор: «Ныридæгæн нæм сывæллæттæн хъарм хæринаг дæттыны хъуыддаджы къуылымпыдзинæдтæ нæй. Æрвылбон æй дӕттӕм 314 скъоладзауӕн. Дыккаг, æртыккаг æмæ 4-æм урочыты фæстæ. Дзидза, дыргътæ, халсартæ - иуылдæр сты хæрзхъæд ӕмӕ хӕрзад. Хæринаггæнджыты куыст у нывыл. Сабиты зæрдæмæ хæринæгтæ цæуынц. Раст ма ерыстæ дæр скæнынц, чи тагъддæр бахæрдзæн, зæгъгæ.» Домæнтæм гæсгæ, скъоладзаутæ райсомæй æнæмæнг хъуамæ бахæрой хъарм кас, къæдор кæнæ айкæй конд хæринаг, стæй цай кæнæ какао. Райсомы хæринагмæ ис бафтауæн дыргъгтæ, халсартæ, æнгузтæ, йогурт. Скъоладзауы сихоры хӕрдмӕ хъуамæ бахæссой халсартæй салат, хъармхуыпп, дыккаг хæринагæн та дзидза кæнæ кæсаг. Скъолаты хæринаг куыд цæттæ кæнынц, уымæ æппынæдзух сæ хъус дарынц республикæйы ахуырад æмæ наукæйы министрад. Хъарм хæринаг республикæйы скъолаты куыд дæттынц, уыцы хъуыддаджы фæдыл арæзт ӕрцӕуынц рейдтæ. Сæ хъуыдымæ гæсгæ, сывæллæттæн хæрзад хæринаг скæнын у алы скъолайы хæс дæр. Хъуысаты Амырхан, РЦИ-Аланийы æхсæнадон палатæйы уæнг: «Æхсæнадон палатæйы уæнгтимæ иумæ радон хатт бабæрæг кодтам 29, 28, 13 -æм ахуырадон уагдæттæ, цæмæй дзы цы къуылымпыдзинæдтæ ис, уыдон аиуварс кæнæм. Сентябрæй фæстæмæ æппæт скъолатæм дæр нæ цæст дарæм. Зæгъын хъæуы уый, æмæ скъолаты хæрæндæттæ кусынц æмбæлгæ фæткмæ гæсгæ. Сывæллæттæн цы хæринаг кæнынц, уый у хæрзад. Махмæ дæр ницы фиппаинæгтæ ис. Ног кусæнгæрзтæ цæуынц æлхæд æмæ арæзт цæуынц ног хæрæндæттæ дæр.» Специалистты ныхæстæм гæсгæ, нырыккон скъоладзаутæ хъуамæ бон 5 хаттæй къаддæр ма хæрой. Хæринæгты хыгъдæй хъуамæ ист æрцæуой адджинæгтæ. Куыд хъусын кæнынц, афтæмæй æрвылбон скъолайы цы хъарм хæринаг хæрынц, уый скъоладзаутæн хорз æххуыс у ног зонындзинæдтæ æнцонтæй æмбарынæн æмæ физикон цæттæдзинад фæхуыздæр кæнынæн. Уыимæ сывæллæттæ фӕцахуыр уыдзысты хорз æмæ пайда хойрæгтæ хæрыныл. Стæй ма æрвылбон уыцы иу афон куы хæрой, уæд уый хорзырдæм фæзындзæн скъоладзауы æнæниздзинадыл дæр. Дзæдзойты Фатимæ  _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv