Æппæтуæрæсеон адæмон фронты уæнгтæ Дзæуджыхъæуы сбæрæг кодтой хæдтулгæтæн æрлæууæн бынæтты уавæр

Дзæуджыхъæуы та Æппæтуæрæсеон адæмон фронты уæнгтæ бæрæг кæнынц, горæты сæйраг уынгты хæдтулгæтæн æрлæууæн бынæттæ цас фаг ис, уый. Шофыртæ арæх æййафынц къуылымпыдзинæдтæ. Сæ хæдтулгæтæ кæм бауромой, ахæм бынат сын нæ вæййы. Уый уæлдай ахсджиаг у, социалон нысаниуæг кæмæн ис, ахæм рæтты. Транспортон цæндтæй Дзæуджыхъæу дисы нæ бафтаудзынæ. Вæййы афтæ, æмæ балц 15-20 минуты фæдæргъвæтиндæр вæййы. Хæдтулгæты нымæц рæзы, дæ исбон кæм ныууадзай, ахæм бынæттæ та къаддæр кæнынц. Горæты бæстастæу уынгтæ нарæг кæм сты, уым хæдтулгæтæн бынæттæ уæвгæ дæр нал вæййы. Афтæмæй та ахсджиагдæр объекттæ æмæ паддзахадон кусæндæттæ сты Дзæуджыхъæуæн йæ историон хайыл. Республикон клиникон æмæ сывæллæтты рынчындæттæ цур ирдæй зыны, æрлæууæн бынæттæ куыд нæ фаг кæны, уый. Арæх уый аххосæй пациенттæ æмæ таксистты ’хсæн загъд рауайы. Иутæ иннæтæн сæ фæндаг æрæхгæнынц. Бирæтæ сæ транспорт ныууадзынц фæндаджы кæрон æмæ фæзилæнты. Уый бынтон хорз нæу, арæх фæндаггон фæткмæ гæсгæ закъоны сæрты ахизынц. Мониторингы рæстæг Æппæтуæрæсеон адæмон фронты уæнгтæ рабæрæг кодтой цалдæр райхалинаг фарстайы. Сæ иу - Барбашовы уынгæй Республикон Клиникон рынчындонмæ бацæуæн. Лæууы дзы шлангбаум æмæ шофыртæ сæхи цы фæкæной, уый нæ фæзонынц. Активисттæ бадзырдтой рынчындоны разамындмæ. Дыккаг бон шлангбаум айстой. Къуылымпыдзинæдтæ ис æмæ сыл хъæуы кусын. Бакусын та сыл хъæуы Паддзахадон инспекцийы специалисттимæ æмæ Дзæуджыхъæуы Администрациимæ. Афтæ хъуыды кæны Æппæтуæрæсеон адæмон фронты эксперт Медойты Тимур. Шофырты ма сагъæсы æфтауынц дуканитæ æмæ базартæм бацæуæн бынæттæ. Растдæр зæгъгæйæ та дзы ахæм бынæттæ кæй нæй, уыцы уавæр. Æппæт информаци æмæ хъусынгæнинæгтæ æхсæнадон минæвæрттæ арвыстой профилон министрадтæм. Дзæдзойты Фатимæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv