Владимир Путин фембæлд РЦИ Аланийы сæргълæууæджы хæстæ рæстæгмæ æххæстгæнæг Сергей Меняйлоимæ

Беслæны социалон-экономикон райрæзт, промышленность, хъæууон-хæдзарад, туризм æмæ ма æндæр ахсджиаг фарстатæ. Кусæг фембæлды рæстæг Владимир Путин æмæ Сергей Меняйло ныхас кодтой регионы райрæзтыл. Фембæлды райдианы Уæрæсейы Президент фæнысан кодта регионы гæнæнтæ. Стæй раздæхта æргом райхалинаг фарстатæм. Беслæны социалон æмæ экономикон рæзты фарстатæй райдыдта йæ ныхас Сергей Меняйло. Сæрмагонд программæмæ хауынц 64 мадзалы. Сæ раззагдæртæй иу - патриотон хъомылад æмæ терроризмы профилактикæйы центры арæзтад. Фæзындзæн 1-æм скъолайы бындурыл. Владимир Путин фæбæрæг кодта, Беслæны æвирхъау цаутæн рох гæнæн кӕй нæй. Уымæ гæсгæ программæйæн æмбæлгæ фæрæзтæ лӕвӕрд æрцæудзысты. Æрдзон уавæртæ æмæ климат, историон æмæ культурон бынтæ, традицитæ. Регионы ног туристон кластер саразынæн ис æппæт уавæртæ дæр. Ныридæгæн райдыдтой курорт «Мамысон»-ыл кусын. Къахдзоныгътыл цæуынæн 82 километры æмæ 2 мин бынаты туристтæн. Уыдон сты фидæны курорты гæнæнтæ. Цæмæй йыл æххæстæй бакусæн уа, уый тыххæй республикæ хъæуы бахæссын проект «Туризм и индустрия гостеприимства»-мæ. Туризм æнгом баст у санаторитæ æмæ курортты дзæбæхгæнæндӕттӕ æмæ реабилитациимæ. Ныртæккæ республикæйы ис иу реабилитацион центр. Кусын райдыдта 1925 азы. Нырыккон домæнтæн дзуапп нал дæтты. Уæлдай æргом аздахын хъæуы центры пульмонологон рынчындонмæ Фыййагдоны. Се 'нæниздзинад дзы фидардæр кæнынц куыд Цæгат Ирыстоны цæрджытæ, афтæ сыхаг регионтæй дæр. Йæ бындурыл саразæн ис рæуджыты низтæ дзæбæхгæнæн центр. Цæгат Ирыстоны рæзы хъæууон хæдзарады къабаз. Дыргътæ æмæ гагадыргъты тыллæг хæстæгдæр 2-3 азы хъуамæ уа 500 тоннӕйы онг. Стыр гæнæнтæ ис кæсагдарынады къабазы. Республикæйы ис валер-кæсаджы 2 хæдзарады. Уæрæсейы базарад ифтонг кæнынц 10 проценты бæрц. Бæрæггæнæн фæфылдæр кæнæн ис 30 проценты онг. Уымæн та хъæуы саразын акваселекцион центр. Республикæйы чи нæ кусы, ахæм промышленнон куыстуæттæ бирæ ис. Сæ иу завод «Электроцинк». Йæ фæзуæттæ сты Дзæуджыхъæуы 64 гектары. Сты Уралы хæххон-металлургон компанийы бæрны. Зæххытæй спайда кæнæн цæмæй уа, уыцы фарстайыл ныртæккæ кусынц. Гæнæн кæм уа, уым сараздзысты æхсæнадон фæзуæттæ кæнæ цæрæнуæттæ. Райхалинаг фарстатæй иу - клинкер. Ногæй йыл бакусæн куыд ис, ууыл куыст цæуы. Владимир Путин фæнысан кодта, алы фарстамæ дæр æххæстæй æргом æздæхт кæй уыдзæн. Уыимæ ма фæбæрæг кодта, риссаг фарстатæ дæр ма регионы кӕй ис. Фыццаджыдæр доны фарста. Республикæйы хъæуы додзæуæн системæтæ сног кæнын. Цæгат Ирыстон архайы Сбербанкы программæ «ПроШкола»-йы. Йæ руаджы республикæйы сараздзысты сывæллæттæн æртæ рæвдауæндоны. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv