Цæгат Ирыстоны райдыдта æппæтуæрæсеон патриотон акци «Часовой у знамени Победы»

Алагиры районы «Уæрæсейы æнæмæлгæ полк»-ы змæлды райдыдта акци «Часовой у знамени Победы». Уый у граждайнаг æмæ патриотон хъомылады æвдисæн. Æрыгон радхæссджытæ æххæст кæнынц вахтæ Уæлахизы тырысайы цур. Кадджын мадзæлттæ ацыдысты Майрæмададжы, Алагиры æмæ Црауы. Фæсивæд рад хæссынц Уæлахизы тырысайы цур. Скъоладзаутæ уый нымайынц стыр кадыл. Алчидæр дзы хæст у иу хъуыдыйыл. Фыдыбæстæйы Стыр Хæсты чи тох кодта, уыдоны хъæбатырдзинадæн рох кæнæн нæй. Акци «Часовой у знамени Победы», зæгъгæ, райдыдта Майрæмæдаджы, Суаргомы хъахъхъæнджыты музейы. 34-æм мотоæхсæн бригады тырыса дзы цæсты гагуыйау хъахъхъæнынц. Нымад у салдæтты уæлахизы нысаныл. Дарддæр акци цыд Алагиры фæндзæм скъолайы. Æрыгон æфсæддонтæ, уæндон къахдзæфтæ кæнгæйæ, хæссынц Уæлахизы тырыса. Алагиры районы хъахъхъæнджыты цыртдзæвæны цур сæмбырд сты скъоладзаутæ, ветеранты Советы уæнгтæ æмæ районы хицауады минæвæрттæ. Иузæрдион сты, ахæм патриотон акцитæ стыр æвæрæн кæй хæссынц рæзгæ фæлтæры хъомыладмæ, уыцы хъуыдыйыл. Уæлахизы тырыса абон кадджынæй ахастой Црауы скъолайы кæрты дæр. Хъæуæй Фыдыбæстæйы Стыр хæстмæ ацыд 300 адæймаджы. 143 дзы хæсты быдырæй нал сыздæхтысты. Уæлахизы тырыса у хъæбатырдзинады нысан. Берлины Рейхстаджы бæстыхайы сæрыл æй сфидар кодтой Алексей Берест, Михаил Егоров æмæ Мелитон Кантария. Йæ кадæн арæзт æрцыд патриотон акци æнæмæлгæ полкы регионалон хайады хъæппæрисæй. Æппæтуæрæсеон акци «Часовой у знамени Победы», зæгъгæ, ахæсдзæн 9 маймæ. Бацарахайын дзы у республикæйы æппæт районты скъоладзауты бон дæр. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv