Æрмадз «Гæлæу» ы аразынц национ музыкалон инструменттæ

Дала æмæ дыууадæстæнон фæндыртæ. Ацы национ музыкалон инструменттæ афæдзы ’рдæджы бæрц аразынц чысыл æрмадз «Гæлæу»-ы.  Фыццаг музыкалон инструменттæ Гæлæуты Валерий æмæ Хадыхъаты Зауыр сарæзтой, хæрз æрыгон ма куы уыдысты, уæд. 2000-æм азты райдианы, лæппутæн уыди сæхи къорд. Куыд зæгъынц, афтæмæй ныртæккæ гитарæйæ цæгъдыныл ахуыр кæнынмæ ис балхæнæн аслам æмæ хорз инструмент. 20 азы размæ ахæм гæнæнтæ нæ уыд. Афтæмæй курдиатджын фæсивæд сæхицæн электрогитарæтæ сæхæдæг сарæзтой. Рæстæг куыд цыд, афтæ фæсивæдæн сæ музыкалон авналæнтæ уæрæхдæр кодтой. Райдыдтой фæсарæйнаг музыкантты зарджытæ ирон æвзагмæ тæлмац кæнын. Цæмæй зарджытæ ирон национ ахорæнтæй срæсугъд уой, уый тыххæй лæппутæ сарæзтой дала-фæндыр. Инструменты зæлтæ сæ зæрдæмæ фæцыдысты. Афтæ Гæлæуты Валерий æмæ Хадыхъаты Зауырмæ фæзынд сæхи æрмадз. Ныр ам афæдзæй фылдæр аразынц ирон национ музыкалон инструменттæ. Национ музыкалон инструментты æрмадз «Гæлæу» уæдæй нырмæ рауагъта 21 дала-фæндыр. Хуыздæр дæсныты фæлтæрддзинадæй пайдагæнгæйæ, Валерий æмæ Зауыр дарддæр хæццæ кæнынц нæ рагфыдæлты музыкалон культурæ. Æрæджы сфæнд кодтой ног инструмент - дыууадæстæнон фæндыр - саразын. Сæ къухы бафтыд. Ныридæгæн сарæзтой дыууæ ахæм инструменты. Æрмадз «Гæлæу»-ы куыст иу уысм дæр не 'рлæууы. Курдиæттæ сæм цæуы æппынæдзух дæр. Алы музыкалон инструментыл архайгæйæ дæр æрмадзы дæснытæ кæнынц сфæлдыстадон куыст. Иннструменттæй иу дæр иннæйы хуызæн хъуамæ ма уа. Национ музыкалон иннструментты кæныны рагон фæтк бахъахъхъæнын — уый у æрмадзы кусджыты фæнд. Æмæ йыл тынг зæрдæргъæвдæй архайынц. Канд сæ къухты фæллойæ нæ, фæлæ ма алы музыкалон инструменты бавæрынц сæ удты хъарм дæр. Дзæдзойты Фатимæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv