Ирон академион театры 14-æм февралы уыд спектакль «Ромео æмæ Джульеттæ»-йы премьерæ

Дзæуджыхъæуы 14-æм февралы уыд спектакль «Ромео æмæ Джульеттæ»- йы премьерæ. Залы театрдзаутæй къух бакæнæн нæ уыд. Æхсызгон уый у æмæ сæ фылдæр уыдысты æрыгæттæ. Уильям Шекспиры трагедийы хъайтарты нырыккон дугмæ рахаста курдиатджын режиссер Уалыты Гиви. Иронау сдзырдтой Плиты Грисы тæлмацы фæрцы. Фæлтæрдджын актертимæ иумæ пьесæйы сæйраг фæлгонцтæ раргом кодтой Цæгат Ирыстоны паддзахадон университеты рауагъдонтæ. Премьерæ бабæрæг кодта не сфæлдыстадон къорд дæр. Шекспиры «Ромео æмæ Джульеттæ»-йыл рæстæг нæ тых кæны. Абон дæр, 400 азæй фылдæр рацæугæйæ, адæмы зæрдæты æвзӕрын кæны арф æнкъарæнтæ. Хæрамдзинад æмæ фыдзæрдæдзинады `хсæн та Ирон театры сценæйыл ногæй равзæрди сыгъдæг уарзондзинад. 16-æм æнусы Веронæйы цы цаутæ æрцыди, уыдон Уалыты Гиви рахаста нырыккон дугмӕ. Куыд загъта, афтæмæй йӕ спектаклы руаджы фæнды аныхас кæнын фæсивæдимæ сæхи æвзагыл. Уымæн æмæ дзы цы проблемæтæ ис, уыдон абон дæр сты ахсджиаг. Дыууæ азы размæ «Ромео æмæ Джульеттæ» уырыссаг æвзагыл режиссер сæвæрдта Цæгат Ирыстоны паддзахадон университеты дæр. Уæд дзы хъазыдысты аивæдты факультеты студенттæ. Сæйраг сурæттæ чи раргом кодта, уыдон ныр дæр ивд не 'рцыдысты, фæлæ ныр сты Ирон театры æххæстрæгъ профессионалон актертæ. Сæ хъайтарты сын иронау сдзурын кодта Плиты Грис. Куыд загътой, афтæмæй сын кæд раздæр ныббарæн уыди лыстæг рæдыдтæ, уæд абон хъуамæ равдисой, цы фæлтæрдджын актертимæ хъазынц, уыдоны æмвæзад. Зындгонд æмæ æрыгон актертæн иумæ хъазын уыди æнцон. Зæгъæм, Ромеойы æрдхорд Бенволиойы роль ахъазыди нæ республикæйы сгуыхт артист Джанайты Эльбрус. Куыз бафиппайдта, афтæмæй куыстой бирæ, фæлæ рæстæг тахти тагъд. Уæдæ режиссеры фӕндтӕ дæр сайд не `рцыдысты. Залы къух бакæнæн дæр нæ уыд. Æмæ, кæй зæгъын æй хъæуы, театрдзауты `хсæн уыди тынг бирæ æрыгон фæсивæд. Ирон театр йæ аивадуарзджытæн ноджыдæр цæттæ кæны бирæ æхсызгон лæвæрттæ. Ацы театралон сезоны дæр та алы театрдзау дæр ссардзæн репертуары, йæ зæрдæмæ, æнæмæнг, хæстæг чи бахъара, ахæм спектакль. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv