Цæгат Ирыстоны дарддæр цæуы коронавирусы ныхмæ вакцинаци

Цæгат Ирыстоны цæрджытæ дарддæр цæуынц вакцинаци коронавирусы ныхмæ. Ныридæгæн вакцинæ «Гам-КОВИД-Вак»-æй прививкæ скодтой мингай адæймаджы. Вакцинацийы размæ уал пациенттæ сæ фæндаг ракæнынц терапевтыл, цæмæй сын сæ физикон уавæр сбæрæг кæна. Вакцинæ ма скæныны аххосæгтæ сæм куы нæ разыны, уæд сын скæнынц прививкæйы фыццаг хай. Дыккаг хай, уагæвæрдмæ гæсгæ, скæндзысты 21 боны фæстæ. Коронавирусы ныхмæ прививкæ скæнæн ис лæвар. Уыимæ вакцинаци у барвæндон. Ахæм информацион сыф райсынц, коронавирусы ныхмæ прививкæ чи скæны, уыцы пациенттæ иууылдæр. Бæстонæй дзы фыст сты привикæйы фæстиуджытæ. Уыимæ ма вакцинацийы фæстæ æмбæлгæ амынддзинæдтæ. Зæгъæм, хъæуы нуæзтæй хи аиппæрд кæнын. Уыимæ ма уæззæуттæ исынæй æмæ стрессæй хи хъахъхъæнын. Геннадий Румянцевыл цæуы 82 азы. Ныр райста вакцинæйы фыццаг компонент. Уколы фæстæ йæхи хорз æнкъары. Куыд бафиппайдта, афтæмæй хъæуы хи æмæ бинонты низæй бахъахъхъæнын. Дзæуджыхъæуы фыццæгæм поликлиникæйы дохтыртæ куыд зæгъынц, афтæмæй цæрджытæ вакцинæ арæхдæр кæнын райдыдтой. Зæгъæм, бонмæ прививкæ скæнæм 30 адæймагæн. Се 'хсæн, æрмæст 65 азæй фылдæр кæуыл цæуы, уыдон нæ, фæлæ ма фæсивæд дæр. Медицинон кусджытæ куыд бафиппайдтой, афтæмæй коронавирусæй рынчынты нымæц къаддæр кæны. Уый иууылдæр вакцинацийы руаджы. Йæ фæрцы фæзыны коллективон иммунитет. Дохтыртæ сидынц адæммæ, цæмæй коронавирусы ныхмæ вакцинæ кæной. Медицинон куыстуæтты уый тыххæй ис алы хъæугæ уавæртæ. Вакцинæйы æвæрæнтыл æппынæдзух æфты. Зæгъæм, ныртæккæ поликлиникæ райста «Гам-КОВИД-Вак»-ы ног парти. Æдæппæтæй 1000 дозæйы. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv