РЦИ Аланийы хицауады сæрдары хæдивæг Азымты Иринæ кусæг фембæлды æрныхас кодта культурæ æмæ ахуырады

Культурæ æмæ ахуырады рæзтыл куыд бакусæн ис, уый тыххæй сæрмагонд æмбырды æрныхас кодта вице-премьер Азымты Иринæ. Национ проект «Культурæ»-йы руаджы республикæйы чиныгдонты сараздзысты нырыккон центртæ, уæгъд рæстæг пайдаимæ арвитынæн. Ахсджиаг фарста у æмбæлгæ инфраструктурæ саразын, уыимæ ма специалистты цæттæдзинад дæр. Азымты Иринæ фæнысан кодта, чиныгдонты кусджыты фæлтæрддзинадмæ хъæуы фылдæр æргом аздахын. Национ зонадон чиныгдоны директор Хайманты Иринæ куыд фехъусын кодта, афтæмæй специалистты зонындзинæдтæ сбæрæг кæнынæн сарæзтой программæ тесты хуызы. Йæ бæрæггæнæнтæм гæсгæ арæзт æрцæудзысты дæсныйад уæлдæргæнæн ахуыртæ. Æмбырды ма æрныхас кодтой чиныгдонты бæстыхæйтты уавæрыл, стæй куыд ифтонггонд сты, уыцы фарстатыл. Дзæуджыхъæуы базарадон цетртæй иуы гæнæн ис æмæ фæзына бинонтæн чиныгдон. Фæзындзысты ма республикæйы гуманитарон кълæстæ дæр. Æргом дзы æздахдзысты ирон æвзаг æмæ литературæмæ. Вице-премьеры хъуыдымæ гæсгæ проект бафæлварæн ис Алайнаг гимназы. Уымæн æмæ дзы кусынц полилингвалон системæмæ гæсгæ. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv