Культурæйы галуан «Металлург»-ы ацыд республикон конкурсы кæронбæттæн къæпхæн

Фыдæлтæй нæм цы зонындзинæдтæ æмæ фарны æгъдæуттæ баззад, уыдоныл иузæрдион сты Цæгат Ирыстоны республикон æхсæнадон змæлд «Иудзинад»-ы уæнгтæ. Сæ сæйрагдæр нысаныл нымайынц сæ ахсджиаг куыст, цæмæй рæзгæ фæлтæр æнувыд уой райгуырæн бæстæйыл, уарзой мадæлон æвзаг, ма рох кæной нæ хорз æгъдæуттæ. Сарæзтой, ныридæгæн традицион чи сси, уыцы республикон æркаст «Ирон дæн æз». Скодтой ын хатдзæгтæ культурæйы галуан «Металлург»-ы. Уæлахиздзауты схорзæхджын кодтой кады гæххæттытæ, зæрдылдарæн лæвæрттæ æмæ æхцайы фæрæзтæй. Хæхбæсты цæргæйæ нӕ фыдӕлтӕ цы кусæнгæрзтæй пайда кодтой æмæ нын цы фарны æгъдæуттæ ныууагътой, уый ацы чызджытæ иуылдæр хорз зонынц. Æрæджы конкурс ацыд æгас Ирыстоны фæсивæды 'хсæн. Абон культурæйы галуан «Металлург»-ы сæ тыхтæ æвзæрстой Дзæуджыхъæу æмæ æппæт районты уæлахиздзаутæ. Æдæппæтæй сты фарастæй. Конкурсы фыццаг хæслæвæрд хъуамæ баххæст кодтаиккой рагагъоммæ, ӕмӕ ныффыстаиккой нывæцæн. Сæ хъуыдытæ уыдысты фыст сыгъдæг ирон æвзагыл. Дзырдтой æгъдæуттӕ æмæ культурæйы ахадындзинадыл, сӕ абоны нысаниуӕг куыд ахсджиаг сты, ууыл. Дыккаг хæслæвæрды чызджытæ æвдыстой сæ зонындзинæдтæ ирон бæрæгбæттæ зонынæй. Æртыккаг хæслæвæрд та баст уыд ирон чындзæхсæвы æгъдæуттимæ. Дарддæр сæ зонындзинæдтæ равдыстой, ирон хæдзары дзаумæттæ æмæ мигæнæнтæ зонынæй æмæ семæ куыд раст архайын хъæуы, уымæй. Бæлвырд радзырдтой, нæ фыдæлтæ цы хойрæгтæ кодтой алы бæрæгбæттæм, уый тыххæй дæр. Конкурсы архайджытæн кӕронбӕттӕн хæслæвæрдӕн нысангонд уыдис аивадон фæлварæн. Чызджытæ сæ тыхтæ фæлвæрдтой зарынæй, аив ныхас кæнынæй, кафынæй. Алчидæр йæхи равдыста арæхстджынæй. Скъоладзауты зонындзинæдтӕ æмæ арæхстдзинадæн аргъ чи кодта, уыдонмæ дæр æхсызгон æнкъарæнæ баззад чызджвтæн се 'гъдау æмæ ирондзинадмæ кæсгæйæ. Æртыккаг бынат бацахста Дзæуджыъæуы минæвар. Дыккаг бынатмæ рацыд Советское хъæуы скъолайы ахуырдзау. Фыццаг бынат бацахста Хъæдгæроны астæуккаг скъолайы минæвар. Лæвæрд сын æрцыд кады гæххæттытæ, зæрдылдарæн лæвæрттæ æмæ æхцайы премитæ. Æркаст «Ирон дæн æз» æхсæнадон змæлд «Иудзинад» сæрмагонд паддзахадон программæйы фæлгæты ныр аразы 5-æм аз. Фæззæджы, Джеоргуыбайы мæйы, арæзт æрцæуы æвзонг лæппуты 'хсæн. Уалдзæджы та Иры чызджытæ бакусынц æмхуызонæй сæ ирондзинад бахъахъхъæныныл. Ныр æркасты арæнтæ фæуæрæхдæр уыдзысы. Фæззæджы лæппутты æркасты бацархайдзысты Хуссар Ирыстоны æмæ Лабæйы минæвæрттæ. Уымæй уæлдай ма сæ курдиæттæ æрбарвыстой ирон диаспорæтæ æгас дунейы бирæ бæстæтæй дæр. Дзæдзойты Фатимæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv