Сергей Меняйло амыдта аппаратон æмбырд

Республикæйы министрадтæм бахæсдзысты ивддзинæдтæ. Промышленность æмæ транспорты министрад суыдзæн промышленность æмæ инвестициты министрад, транспорты фарстатæн та дзуапп дæтдзæн фæндаггон хæдзарады комитет. Ивдзинæдты тыххæй Сергей Меняйло фехъусын кодта аппаратон æмбырды рæстæг. Куыд бафиппайдта, афтæмæй ногдзинад кусджыты нымæц фæкъахыр кæнын тыххæй нæу. Сæйраг нысан у ведомствæты хæрзхъæддзинад фæхуыздæр кæнын. Хицауады хæстæгдæр æмбырдмæ бацæттæ кæнзысты ног структурæйы нысаниуæг, адих кæндзысты ведоствæты домæнтæ æмæ бартæ. Æмбырды ма æрдзырдтой эпидемиологон уавæрыл. Уæрæсейы фæлхасгæнджытæм цæстдарды управлени æмæ æнæниздзинад хъахъхъæныны министрадæн бабар кодтой уавæр сбæрæг кæнын. Хатдзæгтæм гæсгæ рахæсдзысты уынаффæ, хи низæй бахизынæн ма ноджы цавæр мадзæлттæ снысан кæндзысты, уый. Сергей Меняйло ма фæсидт, цæмæй адæмæн вакцинæйы пайдайы тыххæй хъусын кæной. Æмбырды паддзахадон исбонады министрадæн бахæс кодтой цыбыр рæстæгмæ Дзæуджыхъæуы æвæгæсæй цы объекттæ ис, уыдонмæ æркæсын. Культурон нысаниуæг цы цыртдзæвæнтæ æмæ объекттæн ис, уыдонæн сæ хицæутты сбæрæг кæнын. Хицауады уæнгтæ ма се 'ргом раздæхтой Гæмæх хохы рæтæн фæндаг айсыны хъуыддагмæ. Горæты администрацийы куыд хъусын кæнынц, афтæмæй къуырийæ кæронмæ объект айсыны проект уыдзæн цæттæ. Рæтæн фæндаджы тыххæй тæрхондоны уынаффæ йæ тыхы бацыд 2018 азы, фæлæ æххæстгонд не 'рцыд. Сергей Меняйло зæрдыл æрлæууын кодта, Гæмæх хохы бакусдзысты инвестицион проект «Алания парк»-ы райрæзтыл. Йæ фæлгæты сараздзысты ног, нырыккон домæнтæн дзуапп чи дæтдзæн, ахæм рæтæн фæндаг. Æмбырды ма куыд фехъусын кодтой, афтæмæй республикæ 16 августмæ райсдзæн лифтыты фыццаг парти - 25 иуæджы. Æдæппæтæй республикæйы баивзысты 100 лифты. Куыд бирæуæладзыгон хæдзæртты, афтæ медицинон куыстуæтты дæр. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv