Битарты Вячеслав æмæ Джусойты Руслан æрныхас кодтой фæсивæдон политикæйы райрæзты программæйыл

Фæсивæдон политикæйы райрæзты программæйыл ныхас кодтой кусæг фембæлды республикæйы сæргълæууæг Битарты Вячеслав, вице-премьер Азымты Иринæ æмæ фæсивæды комитеты сæрдар Джусойты Руслан. Программæ арæзт у цалдæр хайæ. Иууылдæр сты фæсивæды хуыздæр фидæнæн конд. Фæсивæдон политикæйы райрæзты программæ хъуама уа хъомысджын мадзал, йæ куысты хатдзæгтæ та - йæ ахадындзинады дæнцæг. Ныхас цæуы, ныридæгæн царды рауадзын цы хъуыддæгтæ бантыст, уыдоныл. Ахæм хæстæ æвæры республикæйы сæргълæууæг Битарты Вячеслав. Фæсивæдон политикæйы райрæзты программæйы ис 5 хайы - фæсивæды патриотон хъомылад, æрыгæтты инновацион архайд æмæ наукон-техникон сфæлдыстад, фæсивæдон амалхъомдзинад, æхсæнады æвзæрыл нымад цы хъуыддæгтæ сты, уыдоны профилактикæ, бархионты змæлдмæ æрыгон адæмы 'мхиц кæнын, стæй фæсивæды экономикон архайд. Республикæйы бюджеты программæ æххæст кæнынæн рауæлдай кодтой 100 милуан сомы бæрц. Ацы азы январæй уал бавнæлдтой программæйы экономикон хъуыддæгтæ `ххæст кæнынмæ. Презентаци йын скодтой Цæгат Ирыстоны паддзахадон университеты физикон-техникон факультеты. Программæйы иннæ хæйттыл дæр ныридæгæн активонæй архайынц, цы сæрмагонд фæтк снысан кодтой, уымæ гæсгæ. Битарты Вячеслав куыд фæнысан кодта, афтæмæй уæлдай æргом аздахын хъæуы, царды зæрдæхсаинаг фæндагыл чи ныллæуыд, ахæм æрыгон адæммæ. Джусойты Руслан загъта, ацы фарстамæ сæ цæст лæмбынæгæй кæй дарынц, стыр куыст кæй кæнынц. Рæдыд фæндагыл лæуд фæсивæды æмхиц кæнынц спортмæ, кафджыты къордтæм, шахматтæм. Зæгъын ма хъæуы уый дæр, æмæ ныртæккæ республикæйы спортивон залтæй иуы тренировкæтæ кæнынц 200 лæппу æмæ чызджы æххуысцух бинонтæй. Райдыдтой уал дзюдойы клубæй Архонкæйы. Уый фæстæ ма байгом кодтой филиал Дзæуджыхъæуы дæр. Фæфылдæр секциты нымæц: фæзынд дзы националон кæфтытæ æмæ шахмæттæ. Ныртæккæ та ма ахуыр кæнынц ирон æгъдау. Официалон æгъдауæй скъола байгом кæндзысты фæстæдæр. Сфæнд кодтой, цæмæй хæсса, Томайты Омары ном. Центры разамынды ныхæстæм гæсгæ сын кæд æххуыс кæнынц, уæддæр дзы аиппытæ дæр чысыл нæй - коммуналон лæггæдтæ æмæ бæстыхайы хаццонæн фæрæзтæ. Центры разамындмæ егъау фæндтæ ис - алывæрсыг райрæзты кусын æмæ хуыздæр специалистты сæ архайдмæ здахын. Сæйрагдæр та уый у, цæмæй сывæллæттæн сæ бон спортивон центрмæ лæвар цæуын уа. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv