Дзаттиаты Миленæ фæуæлахиз «Ступень в науку» æппæтуæрæсеон конкурсы

Нæ республикæйы Ахуырад æмæ наукæйы министрады хъæппæрисæй æрвылаз цæуы æрыгон иртасджыты конкурс «Ступень в науку», зæгъгæ. 22 дисциплинæйы дзы бацархайы 300 скъоладзауæй фылдæр. Зонындзинæдтæ равдисыны бар дзы ис ахæм предметты, куыд биологи, географи, истори, математикæ, физикæ, хими æмæ æндæрты. Уæлахиздзаутæ стæй бацархайынц æппæтуæрæсеон конкурсы, Мæскуыйы. Уым йæхи æнтыстджынæй равдыста Ногиры 2-æм скъолайы ахуырдзау Дзаттиаты Миленæ. Йæ зонадон разамнæгимæ æрхъуыды кодта цымыдисаг проект. Дзаттиаты Миленæ ахуыр кæны Ногиры 2-æм скъолайы 8-æм къласы. Бирæ предметтæ йæ цымыдисы 'фтауынц. Уарзы литературæ, истори, физкультурæ, фæлæ æппæтæй тынгдæр фенхъæлмæ кæсы биологийы урокмæ. Ахуыр дзы кæнынц зайæгойты зонад. Æрдзы миниуджытæ йæ цыбæл кæнынц. Нæ республикæйы конкурс «Ступень в науку» куы расидтысты, уæд дзы Миленæ сфæнд кодта биологийы секцийы бацархайын. Рагæй йæм цы фарста уыди, ууыл райдыдта кусын йæ ахуыргæнæгимæ. Эксперимент цыди æнæхъæн мæй. Дзаттиаты Миленæ æмæ йæ зонадон разамонæг райстой цалдæр дидинæджы. Сæвæрдтой сæ 20 градусы онг уазалгонд фых доны, боры туагадимæ, сæкæр æвзалыимæ хæццæ дæтты. Сӕ иутæ æрæвæрдтой дыргъты цур, иннæтæ хъарм кæнæ уазал бынаты. Райдыдтой сæм цæст дарын. Дидинæг куы æртонай, уæд доны фæлæууы æрмæст къуырийы бæрц. Уый фæстæ хус кæнын райдайы. Миленæйы куыст æнтыстджын разынд. Боры туагады цы дидинæг сæвæрдта, уый рæсугъдæй фæлæууыди 3 къуырийæ фылдæр. Конкурс «Ступень в науку» арæзт у 2 къæпхæнæй. Республикон æмвæзадыл йæхи хуыздæр чи равдисы, уыдон бацархайынц æппæтуæрæсеон конкурсы. Миленæ сси нæ республикæйы уæлахиздзау æмæ йæ зонадон куыст равдыста «Первые шаги в науке», зæгъгæ, сывӕллӕтты 25-æм æппæтуæрæсеон конкурсы, Мæскуыйы. Цæгат Ирыстоны минæвар уæвгæйæ, Ногиры 2-æм скъолайы ахуырдзау уым дæр йæхи хорз равдыста. Уæрæсейы æппæт регионтæй минæвæртты `хсæн бацахста 1-аг бынат. Æрыгон иртасджыты конкурс «Ступень в науку» 2003-æм азæй нырмæ Цæгат Ирыстоны арæзт цæуы нæ республикæйы Ахуырад æмæ наукæйы министрады хъæппæрисæй. Æрвылаз дзы бацархайы 300 скъоладзауæй фылдæр, 7 азæй-18 азы онг кæуыл цæуы, ахæмтæ. Йæ сæйрагдæр нысан у æрыгон фæлтæры сразӕнгард кӕнын наукæйы бæрзæндтæм. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv