Алайнаг гимназы цæстдарæн советæн уыд æмбырд

Алайнаг гимназы ахуырдзаутæ хъуамæ суой, национ культурæ чи хæсдзæн æмæ парахат кæндзæн, фидæны ахæм фæлтæр. Уыцы хъуыдымæ æрцыди Цæгат Ирыстоны сæргълæууæг Битарты Вячеслав цæстдарæн советы æмбырды. Архайдтой дзы хицауады уæнгтæ, министрадты разамонджытæ, æмæ æхсæнадон организациты минæвæрттæ. Иумæ æрныхас кодтой, райдиан кълæсты цы предметтæм гæсгæ ахуыр кæнынц, уыдоны иртасæн хæтдзæгтыл. Алайнаг гимназы дарддæры куыстæн фæтк снысан кодтой. Ахуырад æмæ наукæйы министр Людмилæ Башарина радзырдта 4-æм кълæсты ахуырдзауты зонындзинæдты æмвæзады тыххæй. Йæ ныхæстæм гæсгæ, ирон æвзаг, математикæ æмæ алфамблай зонынады рæстæмбис балттæ разындысты уæлдæр, иннæ скъолатимæ абаргæйæ. Уырыссаг авзагæй дæр æвзæр бæрæггæнæнтæ нæй, фæлæ цæуыл бакусын хъæуы, уый ис. Ахуырдзаутæн цы фадæттæ аразынц, уыдон дæр аккаг æмвæзадыл сты. Гимназы ис кафджытæ, спорт, шахмæттæ æмæ робототехникæйæ архайынæн хъæугæ гæнæнтæ. Битарты Вячеслав бабар кодта, ахуырадон программæмæ гæсгæ фæстейы чи аззад, уыцы сабитимæ хицæнæй кусын. Фылдæр æргом ирон авзаг ахуыр кæнынмæ аздахын. Ныртæккæ Алайнаг гимназы ахуыр кæнынц 1-æй-4-æм къласы онг. Иннæ аз цыппæрæмкъласонтæ бацæудзысты астæуккаг скъоламæ. Афтæмæй райдайдзæн гимназы программæйы дыккаг къæпхæн. Уымæ, ахуыргæнæндоны директор Цæразонты Мадинæйы ныхæстæм гæсгæ, ахуыргæнджытæ цæттæ сты. Хатдзæгтæгæнæн фæлаврæнтæ цы предметтæй дæтдзысты, уыдон ахуыр кæндзысты уырыссагау, ирон æзвгæй дæр пайда кæнгæйæ. Зæгъæм, Уæрæсейы истори амондзысты уырыссагау, Ирыстоны истори та – иронау. Мадæлон æвзагыл ахуыр кæндзысты музыкæ æмæ нывкæнынад дæр. Специалисттæ сын бацæттæ кодтой хъæугæ чингуытæ. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv