Ансамбль «Æртхурон» æнтыстджынæй архайы алыхуызон фестивальты

Ансамбль «Æртхурон» йæхи аивæй æмæ æнтыстджынæй равдыста æппæтадæмон фестивальты Дагестан æмæ Хъырымы. Къорд иу æмæ дыууæ хатты не ссис уæлахиздзау алыхуызон конкурсты. Афæдзæй-афæдзмæ йæ архайджыты `хсæн фæзыны ног курдиатджын фæсивæд. «Æртхурон»-ы аивадон разамонæг сывæллæтты ахуыр кæны ирон культурæ уарзыныл æмæ традицитæ хъахъхъæныныл. Ансамбль «Æртхурон»-ы кафджытæ сæ фидæнмæ нысæнттæ хорз зонынц. Коллективы тыххæй сæ алчидæр дзуры цæхæрцæстæй. Кафыны аивад сын рæстæг хуымæтæджы æрвитыны хъуыддаг нæу. Уый сын фадат дæтты сæ курдиат раргом кæнынæн æмæ ма зæрдæмæдзæугæ куыст кæнынæн. Сæ сывæллæтты зæрдæргъæвд архайдæй разы сты ныййарджытæ дæр. Уый нæ, фæлæ ма сæхæдæг дæр зæрдиагæй архайынц ансамблы царды. Дзуццаты Зæринæ йæхæдæг къорд азы кафыд национ кæфтытæ. Абон йæ æртæ сывæллоны дæр цæуынц «Æртхурон»-ы ансамблмæ. Æххуыс сын кæны репетициты, семæ фæцæуы гастрольтæм. Уæззау æмæ дæргъвæтин репетицитæй æвзонг кафаг артисттæ нæ тæрсынц. Уымæ сæ разæнгард кæнынц хореографион конкурсты уæлахизтæ. Ансамбль «Æртхурон» Цæгат Ирыстоны кад æнтыстджынæй бахъахъхъæдта фестивальты Дагестан æмæ Хъырымы. Алы кармæ гæсгæ къордтæ райстой 4 фыццаг бынаты. Ансамблы разамонæг - Бестауты Георгий йæ хъомылгæнинæгтæй у сæрыстыр. Фольклорон кæфтыты театр «Æртхурон» фæзынд 2008 азы. 2009 сси Цæгат Ирыстоны паддзахадон педагогон институты хореографион коллектив. Æдæппæтæй дзы архайы 250 адæймаджы. Æрыгон курдиæттæм фидæны æнхъæлмæ кæсы ног ахсджиаг фестиваль. Фидæны аз ацæудзæн Дагестаны. Уым кафджытæ аивадуарзджытæн равдисдзысты сæ иарæхстдзинад. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv