Дзæуджыхъæуы 44 æм астæуккаг скъолайы сæрмагонд проекты фæлгæты кусынц æвзонг специалисттæ

Диплом ма райсгæйæ дæ дæсныйадыл кусын. Ахæм фадат ис Цæгат Ирыстоны педагогон институты студенттæн. Æххæст дзы кæнынц ахуырадæн кусджытæ цæттæ кæныны тыххæй регионалон проекты домæнтæ. Уый руаджы фидæны ахуыргæнджытæ кусынмæ бацæуынц республикæйы скъолатæм. Практикæйы хуызы сæхи арæхстджынæй æвдисынц. Ахуыр кæнын цымыдисагдæр у, зонындзинæдтæ канд теорийы хуызы куы нæ исай, фæлæ ма сæ практикон æгъдауæй дæр куы фидар кæнай, уæд. Плиты Аидæ уый хорз нæ зоны. Ахуыр кæны педагогон институты, фæлæ ма йæхæдæг дæр зонындзинæдтæ дæтты. Математикæ æмæ информатикæйы æрыгон ахуыргæнæг арæхстгай фæндаг ссары алы скъоладзаумæ дæр. Ахæм æрыгон ахуыргæнджытæ 44-æм скъолайы иу æмæ дыууæ нæй. Санахъоты Дианæ ахуыр кæны 5-æм курсы. Ныридæгæн йæхимæ бæрнондзинад райста 5-æм къласы разамонæг суæвынмæ. Дæсныйад равзарыныл бирæ нæ хъуыды кодта. Йæ ныййарджытæ йын кæддæриддæр уыдысты дæнцæг. Цæгат Ирыстоны педагогон институты ахæм студенттæн уæлдай аргъ кæнынц. Æххуыс сын кæнынц урокты æрмæгимæ æмæ фæлмæн ныхасæй. Ахуыргæнæджы дæсныйад скъоладзауæй чи равзары, уыдоны ноджы тынгдæр сразæнгард кæнынц ацы дæсныйадмæ. Цæгат Ирыстоны паддзахадон педагогон институты æххæст кæнынц «Подготовка кадров для системы образования», зæгъгæ, регионалон проект. Ууыл кусдзысты канд ахуыргæнджытæ нæ, фæлæ ма зондамонджытæ æмæ æндæр дзуаппдæттæг специалисттæ дæр. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv