Сбæрæг сты Сæргълæууæджы премийы лауреаттæ бархионты 'хсæн 2023-æм азы. Раззагдæртæн хæрзиуджытæ радта регионы разамонæг Сергей Меняйло. Мадзалы райдиан куыд фæнысан кодта, афтæмæй бархионтæ æхсæнады 'хсæн кæнынц ахсджиаг куыст. Æрвылбон сæ хорз хъуыддæгтæй дæнцæгæн хæссинаг сты канд республикæйы нæ, фæлæ æгас бæстæйы цæрджытæн дæр. Фæйнæ 50 мин сомы премитæ райстой 3 номинацийы уæлахиздзаутæ. Бархионты хуыздæр организацийыл банымадтой Æппæтуæрæсеон фæсивæдон организаци «Ирвæзынгæнджыты студентон корпус»-ы регионалон хайад. Йæ разамонæг Мæзылуаты Аслæнбег. «Волонтерты иугондты хуыздæр разамонæг» номинацийы фæуæлахиз «Доброволец Кавказа» бархионтæн æххуысы Цæгат Кавказы ресурсон центры разамонæджы хæдивæг Цыхуырбаты Ланæ. Номинаци «Бархионты змæлды архайæг»-ы хуыздæрыл банымадтой Æппæтуæрæсеон æхсæнадон организаци « Уæрæсейы Сырх Дзуары» цæгатирыстойнаг хайады координатор Инал Карацуковы. Ацы къабæзты премитæ нысангонд цæуынц бархионты змæлд регионы хъæддыхдæр æмæ парахатдæр кæныны нысанимæ.