Паддзахадон автоинспекцийы специалисттæ аразынц профилактикон рейдтæ

Паддзахадон автоинспекцийы кусджытæ дарддæр тох кæнынц закъонхалджытимæ. Фæндæгтыл цæуыны æгъдæуттæ чи халы, нозтджын кæнæ наркотик хъæстæ цы шофыртæ сты, уыдоны бæрæг кæнынц рейдты руаджы. Ахæм хуызы хъахъхъæнынц бæлццæтты æмæ фистæгцæуджыты æдасдзинад дæр. Рейды нысан у нозтджын шофырты рабæрæг кæнын. Автоинспекцийы кусджытæ уромынц хæдтулгæтæ. Кæсынц, шофыртæм æмбæлгæ гæххæттæ ис æви нæ. Инспектор æмæ шофыры ’хсæн цыбыр ныхасы фæстæ куы рабæрæг вæййы, шофыр уагæвæрд нæ фехæлдта, уый, уæд ын дарддæр ацæуыны бар ис. Фæлæ, фæндаггон фыдбылызтæ кæй аххосæй æрцæуынц, ахæмтæ дæр разыны. Инспектортæ куы фæгуырысхо вæййынц, шофыр ностджынæй сбадт хæдтулгæйы, уый, уæд йын йæ уавæр сбæрæг кæнынц сæрмагонд прибор алкотестерæй. «Профилактикон рейдтæ арæхдæр аразæм сæрдыгон рæстæг. Специалисттæ рацæуынц къордтæй, цæмæй фылдæр хæдтулгæтæм cе 'ргом аздахой. Рейдтæ-иу саразæм, хæдтулгæтæ фылдæр кæм цæуынц, уыцы бынæтты. Алы 2 сахаты дæр рейды инспектортæ ивынц сæ бынат. Фæлладуадзæн бонты рæстæг та рейдтæ саразæм горæтмæ æрбахизæнты. Шофыр урæды бынаты медицинон иртæстытыл куы не 'сразы вæййы, уæд ын бар раттæм уыцы иртæстытæ ацæуын наркологон диспансеры», - Дзæуджыхъæуы фæндаггон-патрулон службæйы батальоны къамандыгæнæджы хæдивæг Кокойты Марат. Уагæвæрд цы шофыртæ нæ халынц, уыдон рейдтæ стыр пайдайыл нымайынц. Æмбарынц æй, хæдтулгæ тæргæйæ, шофыры къухты ис, æрмæст йæхи нæ, фæлæ ма йæ алыварс чи ис, уыдоны цард дæр. Профилактикон рейдтæ Дзæуджыхъæуы фæндæгтыл арæзт цæуынц алы къуыри дæр. Архайынц дзы паддзахадон автоинспекци æмæ мидхъуыддæгты министрады æхсæнадон советы уæнгтæ. Ведомствæты специалисттæ куыд зæгъынц, афтæмæй 2020 азмæ æрцахстой 700 расыг шофыры. Паддзахадон автоинспекцийы кусджытæ дарддæр дæр тох кæндзысты закъонхалджытимæ. Ностджынæй хæдтулгæйыл чи сбада, уыдонмæ æнхъæлмæ кæсы административон ивар æмæ уголовон бæрнондзинад. Хуасдзауты Алинæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv