Дзуарыхъæумæ хæстæг ссардтой арсы фæдтæ

Тар хъæдæй - уазджытæ! Иу райсом Дзуарыхъæуы цæрджытæ ногуард митыл сæ цæст куы ахастой, уæд ма сæ æууæрдгæ дæр акодтой фырдисæй. Растдæриддæр дзы федтой арсы фæдтæ. Нырыккон заманы фæтк адæм нæ фехæлдтой - телефонмæ ист кадртæ уайтагъд Интернеты балæууыдысты. Чи сæ федта, уыдон фæрсынмæ фесты, ницы знаггад ракодта, зæгъгæ? Мах дæр уый базонын бафæндыд. Ацыдыстæм Дзуарыхъæумæ, фембæлдыстæм, кæимæ æмбæлы, уыдонимæ. Ацы кадртæ æнæ ныхæстæй исчи куы федтаид, уæд сæм уыйас æргом здахгæ дæр нæ акодтаид. Фæлæ фæскадры хъæлæсæй бæрæг у, арсы фæдтæ кæй сты. Адæм сæ федтой Дзуарыхъæумæ `ввахс. Фыццаг бакастæй диссаг у: мит нæма сыстад, сырд афтæмæй райхъал æмæ адæмы цæрæнуæтты цурты йæ фæндаг ракодта. Видеокадртæ адæм кæрæдзимæ `рвитыныл фесты - кæд ма фендзынæ афтæ хæстæг дзæмбыджын арсы фæдтæ. Фæлæ ахуыргæндтæ куыд зæгъынц, афтæмæй дзы æнæнхъæлæджы хабарæй ницы федтой. Иунæг хатт дæр арс никæй фос фæцагъта, уæдæ йыл адæм дæр сæхæдæг никуы бамбæлдысты. Цы фæдтæ федтой, уыдон та егъау цæрæгойы не сты, фæлæ æрыгон сырды. Куыд зæгъынц, афтæмæй йыл афæдз æмæ `рдæгæй фылдæр нæ цæуы. Æбæрæг сырд Дзуарыхъæумæ кæй æрбафтыд, уымæн йæ аххосаг ахуыргæндтæ рахуыдтой хъарм зымæг. Æрсытæ сæхицæн холы амал кæныны фæндæй арæх æрбахæстæг вæййынц хъæутæм. Адæмæй сæ фæллад чи уадзы, уыдонæн дæр уæдæ сæ фæлхæрдтыл зилын тынг уарзынц. Адæмы цæрæнбынæттæм æввахс канд æрсытæ не `рбацæуынц. фæуæндондæр сты бирæгътæ, рувæстæ, хъæддаг куыйтæ æмæ бырынкъджынтæ. Кæмæн æмбæлы, уыдон сын сæ алы фезмæлд дæр зонынц. Сидынц адæммæ, цæмæй сæ фосмæ сæ зæрдæ ма `хсайа. Фæд фенджыты сабыртæ кæнын бахъæуы бынæттон администрацийы разамынды дæр. Уæвгæ, адæмæй кæимæ аныхас кодтам, уыдон арсы фæзындыл уыйас нæ сагъæс кæнынц. Тынгдæр сæ тыхсын кæны, дзæгъæл куыйтæ хъæуы алыварс кæй сарæх сты, уый. Цæрджыты загъдау, арс, дам, сыл куы бамбæлид, уæд, дам, ма йын нæхæдæг бузныг дæр зæгъиккам. Калоты Дзерассæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv