Коронавирусы ныхмæ мадзæлттыл æрдзырдтой республикæйы хицауады уæнгтæ

Бынæттон хиуынаффæйады минæвæрттæ хъуамæ ногæй æркæсой æхцайы фæрæзты хæрдзтæм. Уый ног хуызы коронавирусы инфекцийы тыххæй. Цы хатдзæгтæ скæной, уымæ гæсгæ аиуварс кæнæн уыдзæн республикæйы цæрджытæ цы ног къуылымпытæ æййафынц, уыдон. Бæрнон кусджытæн уый бафæдзæхста республикæйы хицауады сæрдар Тускъаты Таймураз. Йæ хъæппæрисæй арæзт æрцыд сæрмагонд видеоконференци. Районты уагдæтты муниципалитетты сæрдартæ радзырдтой, коронавирусы низы нихмæ цавæр мадзæлттæ аразынц, уый тыххæй. Цæгат Ирыстоны се `ппæт районты дæр бирæуæладзыгон хæдзæртты бацæуæнтæ бапырх кодтой сæрмагонд буаргъæдтæ. Бархионтæ нæ республикæйы цæрджытæн æрвылбон хъусын кæнынц, куыд ахсджиаг у хæдзарæй æддæмæ ма цæуын, уый. Тускъаты Таймуразы ныхæстæм гæсгæ, коммуналон лæггæдты хæрзхъæддзинадыл дæр уавæр хъуамæ ма фæзына. Ууыл хъæуы бакусын. Уымæй уæлдай æмбырды архайджытæ æрдзырдтой республикæйы сæргълæууæг Битарты Вячеслав æмæ коронавирусы ныхмæ оперативон штабы сæрдар Тускъаты Таймуразы курдиæттæ куыд æххæстгон цæуынц, уый тыххæй. Цæгат Ирыстоны промышленность æмæ транспорты министр Мæрзойты Владимиры ныхæстæм гæсгæ, цæмæй медицинон уагдæтты кусджыты сæ куысты бынæттæм ласой, уый тыххæй лæвæрд æрцыд транспорт æмæ цæттæгонд æрцыдысты сæрмагонд маршруттæ. Пандемийæйы рæстæг республикæйы социалон-экономикон уавæр куыд æмбæлы, ахæм æмвæзадыл уа, уый тыххæй специалисттæ аразынц хъæугæдæр хойрæгты æргъты мониторинг. Нæ республикæйы экономикон райрæзты министр Томайты Хъазыбег куыд фехъусын кодта, афæмæй профилон ведомствæтæ æрвылбон кæсынц коронавирусы рæстæг адæм цы уавæры сты, уымæ. Министрадтæ нæ республикæйы стыр базарадон центртимæ бафыстой бадзырдтæ. Уымæ гæсгæ хъæугæдæр хойрæгты æргътыл уыцы дуканиты не `фтаудзысты. _ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv