РЦИ-Аланийы хицауады сæрдар Тускъаты Таймураз бабæрæг кодта социалон объектты арæзтад

Тускъаты Таймураз радон хатт сбæрæг кодта социалон объектты арæзтад. Премьер абалц кодта Мичуринойы хъæумæ. Уым аразынц культурæйы хæдзар.  Уыимæ ма сбæрæг кодта Æрыдоны районы спортивон комплексы арæзтадон куыстытæ куыд æххæстгонд цæуынц, уый. Хицауады сæрдар йæ балцæй разыйæ баззад æви нæ, уый базыдта нæ уацхæссæг. Дзæуджыхъæуы 11-æм скъолайы райдиан скъолайы зæронд бæстыхайы бынаты ныр фæзынд ног æртæуæладзыгон корпус. Йæ фæзуат у 2 мин квадратон метрæй фылдæр. Ахуыр кæныны фадат дзы уыдзæн 250 скъоладзауæн. 12 кабинеты, ахуыргæнджытæн уат. Скъолайы сæйраг бæстыхайыл дæр кусын райдыдтой. Хауы культурон нысаниуæг цы объекттæн ис, уыдонмæ. Раздæр уыди Николай Гоголы номыл чызджытæн училищæ. Байгом æй кодтой 1906 азы. Арæзтадон куыстыты рæстæг скъолайыæн йæ историон хуыз нæ раивдзысты. Заводы поселоччы дарддæр аразынц дыууæ рæвдауæндоны. Бынат дзы уыдзæн 280 сабийæн. Ныр æгас поселоччы ис æрмæст иу рæвдауæндон. Бирæ ныййарджыты бахъæуы сæ сабиты горæтмæ ласын. Ногты фæзындимæ хъуыддаг хуыздæры 'рдæм раивдзæн. Премьер Æрыдоны районы бабæрæг кодта цалдæр объекты. Сæ иу нырыккон спортивон комплекс. Аразынц æй нацпроект «Демография»-йы фæлгæты. Дыууæуæладзыгон бæстыхайы уыдзæн уавæртæ аэробикæ, хъæбысхæт, бокс, волейбол æмæ баскетбол, теннис æмæ фехтованийæ архайынæн. Мичуринæйы даддæр цæуы культурæйы хæдзары бындурон цалцæг. Ныртæккæ æххæст кæнынц мидæггаг куыстытæ. Кæронмæ ахæццæ уыдзысты майы. Ног кæнынц Рассветы культурæйы хæдзар дæр. Куыстытæ райдыдтой 2020 азы кæрон. Уалдзæджы кæронмæ культурæйы артдзæст хъæуы цæрджытæн йæ дуæрттæ байгом кæндзæн. Хъæуы байгом ног фелсырон-акушерон пункт. Бонмæ медицинон лæггæдтæ райсæн дзы уыдзæн 8 адæймаджы бон. Пункт æххæстæй цæттæ у кусынмæ.  Уæрæх кабинеттæ, нырыккон кусæнгæрзтæ æмæ дæсны специалисттæ. Дарддæр премьер йæ фæндаг акодта Кировы районмæ. Ставд-Дурты нацпроект «Культурæ»-йы фæлгæты аразынц культурæйы ног хæдзар. Тускъаты Таймуразмæ разынд фиппаинæгтæ бæстыхайы æддаг бакастмæ. Проектмæ гæсгæ уыдзæн алюминийæ. Премьеры хъуыдымæ гæсгæ 20 азы фæстæ йæ ивын бахъæудзæн. Уымæ гæсгæ йæ самайын хъæуы агуыридуртæй. Атæмæй бирæ азты фæлæудзæн. Хуымæллæг æмæ Зилгæйы бындурон цалцæг цæуы культурæйы хæдзæртты. Куыстытæ æххæст кæнынц пъланмæ гæсгæ. Премьер федта Беслæны æрыгон техниктæ æмæ натуралистты станцæ дæр. Социалон нысаниуæг кæмæн ис, уыцы объектты арæзтад куыд цæуы, уый премьер бæрæг кæндзæн дарддæр дæр. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv