Дзæуджыхъæуы таксийы куыст сбæрæг кæнынмæ расидтысты сæрмагонд рейд

Дзæуджыхъæуы таксийы куыст сбæрæг кæнынмæ расидтысты сæрмагонд рейд. Паддзахадон автоинспекцийы, республикæйы промышленность æмæ транспорты министрады кусджытæ шофыртæй домдтой лицензи. Бардæттæг гæххæт цы шофырмæ нæ разыны, уый æрцæуы иваргонд. Хатдзæгтæм гæсгæ, ныртæккæ шофытæй бирæтæм нæй сæрмагонд гæххæттытæ. Адæмæн лæггад кæнынц æнæзакъонæй. Уымæ гæсгæ специалисттæ сидынц адæммæ, цæмæй сæ æдасдзинадмæ хъус дарой. Таксийы сбадгæйæ, шофырæй æрдомой адæмы æмæ рог уæз ласынмæ бардæттæг гæххæт. Бонæй бонмæ горæты уынгтыл такситы нымæц фылдæрæй фылдæр кæны. Егъау автопарктæ сæ архайды арæнтæ уæрæх кæнынц. Фылдæр кæнынц бæлццæттæласæг ног куыстуæттæ дæр. Се 'хсæн гыццыл парктæ, 10 хæдтулгæйы онг кæм ис, ахæмтæ. Æмæ кæд иутæ кусынц закъонмæ гæсгæ, уæд иннæтæ æхцайы фыдæй архайынц йæ сæрты ахизын. Уыдоны сбæрæг кæнынæн Цæгат Ирыстоны промышленносты æмæ транспорты министрады минæвæрттæ Паддзахадон автоинспекцийы кусджытимæ сарæзтой иумæйаг рейд. Йæ сæйраг нысан – таксистты æнæзакъон куыст бауромын. Бонмæ дзуаппдæттæг ведомствæты къамисы уæнгтæ рабæрæг кæнынц 8 барадхæлды онг. Рейды архайджытæ таксийы шофыртæй, фыццаджыдæр, домынц бардæттæг гæххæттытæ, уымæн æмæ æрмæст уыдоны руаджы ис фадат бæлццæтты сæ рог хæссинæгтимæ ласыны бар. Уымæй уæлдай нæй æнæзакъонæй таксийы сæрмагонд нысæнттæй пайда кæнæн дæр. Ацы домæнтæ чи не 'ххæст кæны, уыдон цæудзысты закъонмæ гæсгæ иваргонд. Æнæзакъонæй таксийы сæрмагонд нысанæй пайда кæныны тыххæй ивар у 5 000 сомы. Иуæй-иу такситы шофыртæм та бардæттæг гæххæттæ ис, фæлæ сæ æмгъуыд фæци. Уыдон уал фыццаг хаттæн аирвæзтысты æмбарынгæнæн ныхасæй. Фæлæ зæрдæ бавæрдтой, сæ кустдæттæгимæ ацы фарст кæй алыг кæндзысты, уый тыххæй. Уæдæ таксийы кусгæйæ цы 'фтиæгтæ ис, æмæ фаг сты æви нæ? Уыцы фарстайы тыххæй дæр шофыртæ дыууæ дихы фесты. Æмæ кæд иутæн сæ мызд фаг кæны, уæд иннæтæ разы не сты хъалон фидыныл. Куыд зæгъынц, афтæмæй уый бæрц нæ кусынц. Специалистты ныхæстæм гæсгæ, хъуыддаг афтæ уый тыххæй у, æмæ иутæн бæлццæтты ласын у сæ сæйраг куыст. Уыдонæн, æрвылбон кусгæйæ, се 'фтиæгтæ фаг кæнынц. Иннæтæ та таксийы кусынц уæлæмхасæн куысты хуызы. Æмæ дзы хъалон бафидыны фаг нæ исынц æхца. Ахæм хъуыдыйыл хæст сты егъау автопаркты разамонджытæ дæр. Рейдтæ цæуыдзысты дарддæр. Æнæзакъонæй цы такситæ кусынц, уыдоны сбæрæг кæнынæн ис дзуаппдæттæг ведомствæтæй арæзт кусæг къорд дæр. Йæ архайджытæ сты Æппæтуæрæсеон адæмон фронты минæвæрттæ, Мидхъуыддæгты министрад, Куыстдæттыны комитет æмæ Паддзахадон автоинспекцийы кусджытæ. Куыд фæнысан кодтой, афтæмæй сæйрагдæр у æнæзакъон такситæй пайдакæнынад аиуварс кæнын, уымæн æмæ уый бæлццæтты æдасдзинадæн дæр у тæссаг. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv