Мыхуыры рацыд Хетæгкаты Къостайы музыкалон уацмысты æмбырдгонд

Хетæгкаты Къостайы уырыссаг æмдзæвгæтыл фыст æрцыд музыкæ. Уыцы хъуыддагмæ йæ ныфс бахаста композитор Плиты Мурат. Æрæджы мыхуыры рацыд йæ музыкалон уацмысты æмбырдгонд. Бæлвырддæр хабæрттæ базыдта нæ уацхæссæг Къутæрты Аидæ. Уымæн ныхасы бар. Плиты Мураты райсом кæдфæндыдæр райдайы музыкæйæ. Æрбады йæ инструменты уæлхъус æмæ иу мыр иннæйæ ивгæйæ сæвзæры цавæрдæр уацмыс. Плиты Мурат фыссы алыхуызон музыкæ. Фæлæ æрæджы йæ ныфс бахаста ирон литературæйы бындурæвæрæджы сфæлдыстадмæ. «Я не пророк», «На «BIS», «Христос воскрес!» æмæ ма бирæ æндæр æмдзæвгæтæ ныффыста Хетæгкаты Къоста. Уыимæ, æрмæст иронау нæ, фæлæ ма уырыссагау дæр. Æнæмæнгæй, ирон литературæмæ стыр æвæрæн бахаста. Уыцы æвæрæнтæй бирæ адæм абон дæр ма пайда кæнынц. Плиты Мурат у уыдонæй иу. Ныридæгæн Къостайы фыст 14 æмдзæвгæйыл ныффыста музыкæ æмæ рауагъта чысыл æмбырдгонд. Плиты Мурат йæ фыццаг къахдзæфтæ кæнын райдыдта, 3-æм къласы ма куы ахуыр кодта, уæд. Фидæны йæ бафæндыдис ацæуын аивады фæндагыл. Лæппу равзæрста музыкалон училищæ. Плиты Мурат ныртæккæ дæр фыссы музыкæ нæ аивады кусджытæн æмæ ансамбльтæн. Фидæнмæ та цæттæ кæны ног музыкалон уыцмысты æмбырдгонд. Ныридæгæн Плиты Муратæн цы чысыл уацмысты æмбырдгонд рацыд, уый тираж у 300 экземпляры. Сæ фылдæр сын балæвар кодта скъолатæн æмæ библиотекæтæн. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv