Æхсæнадон транспорты маскæтæ дарыны фæтк æххæстгонд куыд цæуы, уый сбрæг кодтой специалисттæ

Санитарон домæнтæ куыд æххæст кæнынц, уымæ æппынæдзух сæ хъус дарынц бæрнон кусджытæ. Æппæтуæрæсеон адæмон фронты акци «Мы вместе»-йы фæлгæты Дзæуджыхъæуы радон хатт сбæрæг кодтой, æхсæнадон транспорты маскæтæ куыд дарынц, уый. Аныхас кодтой маршрутон такситы бæлццæттимæ. Бамбарын сын кодтой коронавирусы ныхмæ профилактикæйы тыххæй. Уымæй уæлдай ма маскæтæ кæмæ нæ уыди, уыдонæн сæ акцийы фæлгæты байуæрстой лæвар. Иумæйаг рейд маршрутон такситы æрлæууæнты сарæзтой Уæрæсейы фæлхасгæнджытæм цæстдарды управлени, транспортмæ цæстдарды управлени, паддзахадон автоинспекцийы кусджытæ æмæ Æппæтуæрæсеон адæмон фронты уæнгтæ. Сбæрæг кодтой, æхсæнадон транспорты санитарон домæнтæ куыд æххæст кæнынц, уый. Рейдтæ уыцы иу рæстæг цæуынц цалдæр бынаты. Басгæрсты рæстæг куыд рабæрæг, афтæмæй хæдтулгæты хицæуттæн сæ фылдæр санитарон домæнтæ æххæст кæнынц. Хи хъахъхъæнæн фæрæзтæй пайда кæнын домынц бæлцæттæй дæр. Æппæтуæрæсеон адæмон фронты регионалон æххæстгæнæн комитеты сæрдар Гæлиты Клим куыд зæгъы, афтæмæй раздæры рейдты хатдзæгтæм гæсгæ, маскæтæ чи дары, уыдоны нымæц зынгæ фæфылдæр. Профилактикон мадзалы сæйраг нысан - коронавирусы низ парахат кæнын ма уадзын. Республикæйы эпидемиологон уавæр йæ хуыздæртæй кæй нæу, уый тыххæй Уæрæсейы фæлхасгæнджытæм цæстдарды управленийы сидынц цæрджытæм, цæмæй маскæ дарыны фæтк æххæст кæной. Уыимæ ма, адæм бирæгæйттæй кæм æмбырд кæнынц, уыцы рæттæм ма цæуой. Ахæм рейдтæ специалисттæ дарддæр дæр араздзысты. Домæнтæ чи не`ххæст кæна, уыдоны æфхæрдзысты административон æгъдауæй. Хуасдзауты Алинæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv