Зæнджиаты Николай Цæгат Ирыстоны фыцццаг скодта хъуыры ласӕггаджы ракæн операци

Республикон онкологон диспансеры хирургийы хайады куыст у бæрзонд æмвæзадыл ӕвӕрд. Рынчындон хъæздыг у курдиатджын дохтыртæй. Сæ дæсныйад федералон медицинон кусджытæй дæлдæр нæу. Уымæн дæнцæг у хирург-онколог Зæнджиаты Николай. Цæгат Ирыстоны уый фыцццаг скодта хъуыры ласӕггаджы ракæн операци. Уæдæй абонмæ бирæ хатт фервæзын кодта рынчынты цард. Дохтыримæ фембæлд нæ уацхæссæг. Бæлвырддæр йæхæдæг радзурдзæн. Светлана Абрамян æхсызгонæй ӕрхъуыды кӕны, республикон онкологон диспансеры дохтыртæ йын дыккаг цард кæй балæвар кодтой, уый. Цалдӕр азы размӕ сылгоймагмӕ дохтыртӕ рабӕрӕг кодтой хъуыры ласӕггаджы рак, 3-аг къӕпхӕн ын сывӕрдтой. Дохтырты руаджы фервӕзт. Зӕнджиаты Николай йӕ рынчынтимӕ бастдзинад нӕ халы, куы сӕ рафыссы, уӕддӕр. Йӕ хъус фӕдары, сӕхи куыд фенкъарынц, уымӕ. Алы хатт дӕр сын баххуыс кӕнынмӕ вӕййы цӕттӕ. Зӕнджиаты Николай у фыццаг дохтыр, нӕ республикӕйы ахӕм операци чи скодта. Уымӕй уӕлдай ма, алыхуызон операцитӕ дӕр кодта. Ацы куысты лӕуд у 6 азы. Ацы дӕсныйад равзӕрста йӕ бинонтӕм гӕсгӕ. Йӕ дада ӕмӕ нана дӕр уыдысты дохтыртӕ. Уымӕ гӕсгӕ дызӕрдыг нӕ кодта ӕмӕ йын къуылымпыдзинӕдтӕ нӕ уыд. Медицинон академи каст куы фӕцис, уӕд арӕндоны куыста акушерӕй. Уый фӕстӕ бацыд хирургимӕ. Уыцы бонӕй фӕстӕмӕ скальпель йӕ къухтӕй нӕ айста. Афӕдзмӕ скӕны 150 операцийы бӕрц. Ӕппӕтӕй фылдӕр операци кодта 14 сахаты бӕрц. Алы операцийы размӕ дӕр дохтыр аныхас кӕны йе 'мкусджытимӕ. Куыд зӕгъы йӕхӕдӕг, афтӕмӕй алы кусӕджы цӕстӕнгас дӕр базонын хъӕуы. Кусджытӕ йӕ иууылдӕр уарзынц. Йӕ фӕлтӕрддзинад дӕр сын не 'вгъау кӕны. Республикон онкологон диспансеры хирургион хайад ис бӕрзонд ӕмвӕзадыл. Рынчындоны кусынц фӕлтӕрдджын дохтыртӕ. Уымӕй уӕлдай ма дзæбæхгæнæндон лӕууы федералон медицинон уагдӕтты ӕмрӕнхъ. Уазиты Зæлинæ. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv