Алагиры кæфтыты ансамбль «Осетия» ссис 7 æм æппæтадæмон фестиваль «Танцевальное пламя» йы уæлахиздза

Алагиры район рагæй-æрæгмæ дæр хъуыстгонд у йæ курдиатджын фæсивæдæй. Аивадмæ ацы районы минæвæрттæ хæссынц стыр æвæрæн. Ныр дæр та Алагиры районы кæфтыты ансамбль «Осетия» йæхи иттæг хорз равдыста. Архайдта æвдæм æппæтадæмон фестиваль «Танцевальное пламя»-йы. Алагиры 3-æм скъолайы кæфтыты ансамбль «Осетия»-йыл ныр цæуы 2 азы. Бирæ у, æви гыццыл, фæлæ ацы рæстæгмæ сæ къухы профессионалон сценæйыл бирæ æнтыстдзинæдтæ бафтыд. Ансамблы минæвæрттæ арæх ацæуынц алыхуызон балцытæм. Уыдысты Мæскуыйы, сыхаг регионты, уым архайдтой алыхуызон конкурсты, кæй зæгъын æй хъæуы-æнтысджынæй. Ныр дæр та зæрдæргъæвдæй бацархайдтой æвдæм æппæтадæмон фестиваль «Танцевальное пламя»-йы. Кæй зæгъын æй хъæуы, афтид къухæй не ссыдысты. Бацахстой цыппар раззагдæр бынаты. Ирон кæфтытæ - ирон адæмы уæздандзинады æвдисæнтæ. Алы кафт дæр равдисыны аккаг. Фæлæ ацы фестивалы ансамбль адæмы размæ рахаста симд, горский æмæ чызджыты кафт. Жюрийы уæнгтæ ирон кафтæн скодтой стыр аргъ. Ансамбль сси гран-прийы аккаг. Ансамблы æрвылбоны репетицитæ вæййынц сæрмагонд залы. Арæх сæ сывæллæтты бакæсынмæ æрбацæуынц сæ ныййарджытæ дæр. Сæхæдæг куыд зæгъынц, афтæмæй, сæ сывæллæттæн нæ бæстæйы иннæ регионтæм цæуыны фадат кæй ис, уымæй сæ зæрдæ райы. Раппæлинаг у кæфтыты къорды разамонæг Гуысалты Альбинæ дæр. Уый бирæ азты дæргъы кафыд Паддзахадон адæмон кæфтыты ансамбль «Алан»-ы, йæ курдиаты цæхæрæй буц кодта аивадæн стыр аргъ чи кæны, уыдоны. Паддзахадон адæмон кæфтыты ансамбль «Алан»-ы ном айхъуыст æппæт дунейыл. Зæххы къорийыл сын тыхджын къухæмдзæхдæй æгас цæуай цы ран нæ загътой, ахæм нæ баззад. Ацы ансамбль Алагиры кафджыты къордæн у фæзминаг. Зæрдæ дарынц, алагираг ансамбль «Осетия»-йы ном дæр фидæны æппæт дунейыл дæр кæй айхъуысдзæн. Гæззаты Зæринæ _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv