Уæрæсейы фæлхасгæнджытæм цæстдарды Цæгат Ирыстоны управленийы кусджытæ рацыдысты радон рейды

Низæй адæмы бахъахъхъæныны тыххæй æрвылбон рейды рацæуынц Уæрæсейы фæлхасгæнджытæм цæстдарды управленийы кусджытæ. Мадзалы сæйраг нысан - санитарон домæнтæ куыд æххæстгонд цæуынц, уый сбæрæг кæнын. Ацы хатт федтой маршрутон такситы бæлцæттæ маскæтæ дарынц æви нæ, уый. Ныр цалдæр азы Бердиаты Рамиз ласы бæлццæтты. Куыд зæгъы, афтæмæй маскæтæ дарын æнæмæнг хъæуы. Йæхæдæг дæр æй æппынæдзух скæны, уымæн æмæ адæмимæ кусы. Фæсиды сæм, цæмæй сæ къухтæ дæр сæрфой. Бердиаты Рамиз, маршрутон таксийы шофыр: «Маскæ дарын, куыд æмбæлы, афтæ. Бæлццæттæн дæр ма балхæнын маскæтæ. Адæмимæ кусгæгæйæ æндæр гæнæн нæй. Къæрццхъус уæвын хъæуы. Хатгай адæмы нæ фæфæнды маскæ кæнын, фæлæ сын æй бамбарын кæнын, хъæугæ хъуыддаг кæй у, уый». Республикæйы сæргълæууæджы хæстæ рæстæгмæ æххæстгæнæг Сергей Меняйлойы бардзырдмæ гæсгæ, Цæгат Ирыстоны фæхъæддыхдæр сты санитарон домæнтæ. Уæлдайдæр та, бирæ адæм кæм æмбырд кæны, ахæм бынæтты. Хъаныхъуаты Сергей, РЦИ-Аланийы транспорт æмæ промышленносты министрады сæйраг специалист эксперт: «Фæндæгтыл æдасæй цæуыны паддзахадон инспекци æмæ Фæлхасгæнджытæм цæстдарды упраленийы специалисттимæ иумæ скæнæм рейдтæ, маскæтæ дарыны фæтк чи халы, уыдоны сбæрæг кæныны нысанимæ. Ковидæй рынчынты нымæц кæй фылдæр кæны, уый тыххæй нæ фæнды республикæйы цæрджытæм фæсидын, цæмæй санитарон домæнтæ æххæст кæной. Æмæ кæд адæмæн сæ фылдæр дары маскæтæ, уæддæр разыны ахæмтæ, санитарон фæтк чи халы». Ахæм рейдты Фæлхасгæнджытæм цæстдарды управленийы кусджытæ рацæуынц æрвылбон. Маскæтæ дарыны фæтк республикæйы нырма ист нæма 'рцыд. Хынцæгты Виталий, фæлхасадмæ цæстдарды Цæгатирыстойнаг управленийы барадон хайады сæйраг специалист: «Ныридæгæн уал баурæдтам 10 хæдтулгæйы. Шофыртæ, уавæр æмбаргæйæ, санитарон домæнтæ æххæст кæнынц. Уавæр хорзыл банымайæн ис, фæлæ ма бакусинаг фарстатæ дæр чысыл не сты. Маскæтæ дарынц цæрджыты 30-40%. Цæстдарæн мадзæлттæ фæхъæддыхдæр кæндзыстæм». Зæгъын хъæуы уый, æмæ фæткхалджыты нымæц чысыл нæу, æмæ сæ бæрæг кæнынц цæстдарæн куыстуæтты специалисттæ. Бæлццæттимæ дæр ныхас кæнынц, цæмæй сæхи хъахъхъæной. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv