Уæрæсейы сывæллæтты фонд Тарскæйы скъолайæн балæвар кодта спортивон кусæнгæрзтæ

Сабиты рæзтæн хъуамæ арæзт цæуой æппæт фадæттæ дæр. Ахæм хъуыдыйыл хæст сты Уæрæсейы сывæллæтты фонды уæнгтæ. Хъæугæ кусæнгæрзтæй ифтонг кæнынц сывæллæтты уæлæмхасæн ахуырады бынæттæ - æрмадзтæ, спортивон залтæ. Ныр дæр та фонды уæнгтæ абалц кодтой Тарскæйы 1-æм скъоламæ. Уыимæ ма афтид къухæй нæ. Алы бон дæр искæмæн хорз ракæнын. Ахæм хæс сæ размæ æвæрынц Уæрæсейы сывæллæтты фонды. Бархионтæн ахсджиагдæр у сывæллæттæн æххуыс кæнын, лæггад кæнын, уыимæ ма сæ хъахъхъæнын дæр. Скъолаты æмæ рæвдауæндæтты уазджытæ арæх вæййынц. Ныр дæр радон хатт бабæрæг кодтой Тарскæйы хъæуы сывæллæтты. Денис Федорович, Уæрæсейы сывæллæтты фонды регионалон хайады разамонæг: «Нæ организаци ныр 30 азæй фылдæр нæ хæрзаудæн æххуыс кæны нæ республикæйы адæмæн. Уæлдай æргом здахæм скъолатæм. Фæнды нæ, цæмæй сывæллæттæн фадæттæ уа аивад æмæ спорты архайынæн. Ацы аз тынгдæр не `ргом аздæхтам хъæуты скъолатæм». Ацы аз дæр Президенты грантты фонды фæрцы сæ къухы бафтыд бирæ хорздзинæдтæ. Сифтонг кодтой хъæугæ кусæнгæрзтæй 9 спортивон залы æмæ 12 сфæлдыстадон къорды. Уыдоны `хсæн Тарскæйы скъолайы музыкалон инструментты æрмадз æмæ спортивон залтæ. Ныр дæр та сæм фонды регионалон хайады размонæг афтид къухæй не `рбацыд. Æрбахаста сын спортивон дзауматæ. Скъолайы кусы аивадон гимнастикæйы къорд дæр. Архайы дзы 12 сывæллоны. Сæ тренеры ныхæстæм гæсгæ, кæд зæрдæргъæвдæй тырнынц спорты бæрзæндтæм, уæддæр сын раздæр хъæугæ фадæттæ нæ уыди. Уæрæсæйы сывæллæтты фонды кусджытæ уыцы хъуыддаг дæр фæхуыздæр кодтой. Зал сифтонг кодтой æппæт хъæугæ дзауматæй. Денис Федоровичмæ разынд лæвæрттæ гыццыл чызджытæн дæр. Уæдæ кæд скъолайы бындурыл национ инструментты æрмадз ис, уæд уый архайд дæр зынгæ фæрæвдз. Балæвар сын кодта кусæнгæрзтæ. Ныр скъоладзау сцæттæ кæны инструмент 2 мæймæ. Ам ыл уыцы иу рæстæг базоны цæгъдын дæр. Æмбæлгæ уавæрты кусын дæр æхсызгон у, зæгъынц ахуыргæнджытæ. Куыд бафиппайдтой, афтæмæй сывæллæттæ тынгдæр райдыдтой тырнын спортмæ дæр æмæ аивадмæ дæр. Фонд стыр æххуыс бакодта, Æрыдон, Рахизфарс, Алагир, Киров æмæ Горæтгæрон районы сывæллæттæй спорт æмæ аивады чи архайы, уыдонæн. Денис Федорович, Уæрæсейы сывæллæтты фонды регионалон хайады разамонæг: «Хъавæм нæ хæлардзинад скъолатимæ кæнын хъæддыхæй хъæддыхдæр. Ис нæм бирæ нысæнттæ. Зæгъæм, хæстæгдæр рæстæг абалц кæндзыстæм Беслæны æмæ Фарныхъæуы æрмадзтæм». Æххуыс кæнынц, йе `нæниздзинад хъыгдæрд кæмæн у, уыцы сабитæн дæр. Сæ ахадгæ хорздзинæдтæ ныр 30 азæй фылдæр сæхиуыл æнкъарынц нæ бæстæйы 67 регионы. _________________________ Мы рядом в: vk.com/irystontv instagram.com/irystontv youtube.com/irystontv twitter.com/irystontv ok.ru/irystontv